Այսօր Ավետիսյան դպրոցը հյուրընկալել էր ԱՅԲ կրթական հիմնադրամի հոգաբարձուների խորհրդի նախագահ Արամ Փախչանյանին, ում հասարակական եռանդուն աշխատանքի գործուն ոլորտներից են 21-րդ դարում առկա կրթական հիմնախնդիրները, կրթության առջեւ ծառացած մարտահրավերները, դրանց լուծման ուղիների որոնումները:
Հանդիպման ընթացքում արծարծվեցին այդ խնդիրներից շատերը: Ներկաները՝ 10-12 դասարանների աշակերտները, առանձնահատուկ ուշադրությամբ լսեցին հյուրի մեկնաբանությունները արհեստական բանականության դրական եւ բացասական կողմերի, արտադրության, գյուղատնտեսության, տվյալների վերլուծության, սպասարկման եւ կյանքի բազմաթիվ այլ բնագավառներում դրա ներդրումից ակնկալվող առավելությունների եւ սպառնալիքների մասին:
Բնականաբար, դահլիճում ծագում էին հարցեր, որոնցից յուրաքանչյուրին Ա. Փախչանյանը տալիս էր հանգամանալից մեկնաբանություն եւ համակողմանի պատասխան:
