Ոգեկոչում
2016 թվականի ապրիլյան քառօրյա պատերազմի հերոսներին էր նվիրված պատմության ուսուցիչ Արմեն Հովսեփյանի կազմակերպած հիշատակի միջոցառումը: Հուզիչ ասմունք եւ խոսք, փոքրիկ բեմականացում, քառօրյայի հերոսների մասին պատմող տեսանյութ: Դահլիճը դիտում էր լուռ, ակնածանքով լեցուն:
Ցուցադրվեց «Մեր ժամանակի հերոսը» հեռուստաֆիլմը՝ նվիրված Արցախի հերոս եւ ՀՀ «Մարտական խաչ» առաջին աստիճանի շքանշանի ասպետ (երկուսն էլ՝ հետմահու), ազգությամբ եզդի Քյարամ Սլոյանին:
Ի պատիվ միջոցառման կազմակերպչի եւ նրա մտահղացումը կյանքի կոչած տասներորդցիների՝ պետք է փաստել, որ ավետիսյանցիները բեմ էին դուրս եկել պատասխանատվության բարձր զգացումով եւ հանդես եկան մեր հերոսացած քաջերին արժանավայել: Նրանց ելույթով եւս մեկ անգամ հաստատվեց ընկած հայորդիների սխրանքը՝ որպես ապրելու եւ ապրեցնելու հրամայական:
