Հկտ 22, 2021 | Մեր առօրյան
ԵՐԵՎԱՆ-2803
Երևանի անցյալը, ներկան ու ապագան, ասես միաձուլված, սփռվել էին պատանիների հիացական հայացքների ներքո:
Միշտ հին ու նոր Երևանի թանգարանում
Մայրաքաղաքի տարեդարձին էր նվիրված Ավետիսյան դպրոցի 8-րդ «ա» դասարանի էքսկուրսիան դեպի Երևան քաղաքի պատմության թանգարան: Դասղեկ Նարինե Մելիքյանի հետ նրանք շրջեցին թանգարանի սրահներով, դիտեցին թանգարանում պահվող որմնանկարները, սեպագիր արձանագրությունները, հնագիտական հավաքածուները, բազմաթիվ այլ առարկաներ, որոնք խոսուն վկան են մեր մայրաքաղաքի հարուստ հնագույն անցյալի, արտացոլում մեր ժողովրդի բազմադարյա մշակույթը, հոգևոր կյանքն ու գեղարվեստական բարձր ճաշակը: Պատանի ավետիսյանցիները ուշիուշով լսում էին թանգարանի աշխատակցի բացատրությունները, նրան ուղղում տարաբնույթ հարցեր:
Ինչպես և ակնկալվում էր, հատկապես ուշագրավ էր հին Երևանի մանրակերտը, որի համայնապատկերը պատանիներին տարավ 100 տարով ետ՝ շրջելու հին մայրաքաղաքի թաղամասերով ու փողոցներով, տեսնելու նրա եկեղեցիներն ու այգիները: Երևանի անցյալը, ներկան ու ապագան, ասես միաձուլված, սփռվել էին պատանիների հիացական հայացքների ներքո:
Երևանի քաղաքապետարանում ութերորդցիներին սպասում էր ևս մեկ հաճելի անակնկալ. նրանց այցը համընկավ գեղանկարիչ Սուրեն Խորենյանի գործերի ցուցահանդեսի բացման հետ: Անվանի նկարիչ Վահան Խորենյանի և սիրված երգչուհի Ֆլորա Խորենյանի որդին՝ Հայաստանի նկարիչների միության, ՅՈՒՆԵՍԿՕ-ի նկարիչների միջազգային ընկերակցության անդամ Սուրեն Խորենյանը «Ծաղիկներ» խորագրով իր այս ցուցադրությունը նվիրել էր մեր հերոսների հիշատակին:
Հկտ 21, 2021 | Մեր առօրյան
Այսօր՝ հոկտեմբերի 21-ի կեսօրին, բահերի, քլունգների և դույլերի զնգոցն էր իշխում Ավետիսյան դպրոցի չորս կողմում: Ավագ դպրոցի սաները Ասիական զարգացման բանկի Հայաստանի ներկայացուցչության և դպրոցի վաղեմի բարեկամ ու գործընկեր Armenia Tree Project (Հայաստան ծառատունկ) ծրագրի ներկայացուցիչների հետ կրթօջախի շրջակայքի ծառածածկը հարստացրին ևս 50 տնկիներով. տնկարկվեցին 25-ական գիհի և եղևնի:
Հողային աշխույժ աշխատանքից հետո պատանի ավետիսյանցիները հայերենով ու անգլերենով հյուրերին ներկայացրին սիրելի դպրոցի ներսակողմը:
2014 թվականին դպրոցի նոր շենքի շահագործումից հետո սա վեցերորդ ծառատունկն էր նրա շրջակայքում: Կանցնեն ոչ շատ տարիներ, և Ավետիսյան կրթօջախ մտնողներին կդիմավորի կանաչախիտ պուրակը:
Համատեղ ծառատունկի լուսանկարները՝ հաջորդիվ:
Հկտ 18, 2021 | Մեր առօրյան
Արդեն 10 տարի է, ինչ ՀՀ ԳԱԱ էկոլոգանոոսֆերային հետազոտությունների կենտրոնում գործում է ՅՈՒՆԵՍԿՕ-ի «Կրթություն հանուն կայուն զարգացման» ամբիոնը, որի ուշադրության առանցքում ոչ ֆորմալ կրթությունն է: Վերջերս Ավետիսյան դպրոցի 11-րդ դասարանի աշակերտները «Բնօգտագործում» առարկայի ծրագրի շրջանակներում իրենց ուսուցչուհի Քրիստինե Գևորգյանի ղեկավարությամբ այցելեցին էկոլոգանոոսֆերային հետազոտությունների կենտրոն, որտեղ իրականացվում են կիրառական և հիմնարար ուսումնասիրություններ՝ ուղղված շրջակա միջավայրի պահպանությանը, սննդի անվտանգությանը, գյուղատնտեսության և բնապահպանության այլ ոլորտների:
Ավետիսյան դպրոցի բնապահպանների պատվիրակներին ջերմորեն ընդունեց կենտրոնի տնօրեն Լ. Սահակյանը և իր գործընկերների հետ մեկտեղ նրանց ծանոթացրեց կենտրոնի՝ բնապահպանական ոլորտին առնչվող գիտական հետազոտություններին, հեռազննման և տեղեկատվական նորագույն տեխնոլոգիաների օգնությամբ օդատիեզերական մեթոդի կիրառման հմտություններին:
Հկտ 8, 2021 | Մեր առօրյան
Ավետիսյան դպրոցի ավագ դպրոցի աշակերտները և ուսուցչակազմը հյուրընկալեցին ամերիկահայ գրող, հրատարակիչ, գրականագետ-մատենագետ, թարգմանիչ, մանկավարժ, հետազոտող գիտնական և բարերար Հովսեփ Նալբանդյանին (Յովսեփ Նալպանտեան)։
Սա սփյուռքահայ մտավորականի և հասարակական գործչի հետ երկրորդ այցն էր Ավետիսյան դպրոց: Հյուրը դատարկաձեռն չէր եկել: Շարունակելով իր շրջայցը հանրապետության մարզերի և մայրաքաղաքի ուսումնական հաստատություններ՝ նա կատարում է հայության երկու հատվածները միացնող մշակութային դեսպանորդի՝ կամովին ստանձնած իր առաքելությունը. տարբեր լսարանների առջև ելույթ է ունենում պատմության, մշակույթի, ազգային հարցերի, Սփյուռքի և հայրենիքի տագնապների վերաբերյալ ելույթներով, ինչպես նաև նվիրում է իր հեղինակած գրքերից: Ի դեպ, վերջին երկու տասնամյակի ընթացքում Արցախում և Հայաստանում նրա նվիրաբերած գրքերի թիվն անցնում է 11 հազարից:
Այս անգամ նա նախ՝ ներկայացրեց, ապա՝ Ավետիսյան դպրոցի գրադարանին նվիրեց իր հեղինակած 10 անուն գիրք, որոնց թվում նաև «Լույս» վեցհատորյա հանրագիտակի երկու հատորը:
Հկտ 7, 2021 | Մեր առօրյան
Ուսուցչի տոնն Ավետիսյան դպրոցում նշվեց գեղեցիկ, բայց և զուսպ հանդիսությամբ: Իր գործընկերներին ջերմ մաղթանքներ հղեց, հայ ուսուցչի դարավոր և հատկապես մերօրյա առաքելության մասին խոսեց կրթօջախի տնօրեն տիկին Մելանյա Գեղամյանը:
Ցերեկույթին ներկա էին նաև դպրոցի վաղեմի բարեկամները «Էլ Թի ՓԻ» (Հայաստան ծառատունկ) ընկերությունից, որի գործադիր տնօրեն Ջինմարի Փափելյանը ներկաներին փոխանցեց դպրոցի հիմնադիր, բարերար Էդվարդ Ավետիսյանի շնորհավորական ուղերձը:
Մեր շնորհալի աշակերտները երգով, ասմունքով ու պարով ողջունեցին սիրելի ուսուցիչներին: Գործընկերներին իր հաճելի անակնկալը մատուցեց նաև տիկին Գեղամյանը: Ապա բոլորով Միացյալ Նահանգներ՝ սիրելի բարերարին հղեցինք մեր համերաշխ ու սրտագին ողջույնը և շուտափույթ հանդիպման բարի հորդորանքը:
Ավետիսյան դպրոցի ուսուցիչները, հիրավի, հպարտանալու շատ բան ունեն (դրա վառ վկայությունն են մեր սաների դպրոցական և հետդպրոցական ակնհայտ հաջողությունները). և մի՞թե նրանց հրաշալի աշխատանքի արդյունքը չէին նաև բեմից հնչող անթերի հայերենն ու նաև անգլերենից հայերեն և հակառակը համաժամանակյա (սինխրոն) թարգմանությունը, որ սահուն և ճկուն կատարում էին 11-րդ դասարանի աշակերտները:
Թող այսպես շարունակվի քո անխոնջ տքնանքը, Ավետիսյանի ընտրյա՛լ ուսուցիչ:
Թող միտքդ միշտ այսպես պայծառ մնա, եռանդդ՝ անսպառ, աշակերտդ՝ միշտ շնորհակալ:
Եվ թող տոն լինի քո ամեն մի օրը:
Հկտ 1, 2021 | Մեր առօրյան
«Հայրենասիրությունն սկսվում է հայրենաճանաչությունից». Րաֆֆի:
Սեպտեմբերյան խճանկար
Անցավ ղողանջուն սեպտեմբերը՝ տխուր և ուրախ, հուզումնալից ու հագեցած, դասերով և դասացուցակով, հյուրերով ու հանդիպումներով, համազգային խոնարհումի և լռության րոպեով և աշնան ջերմացնող արևով…
Ուստարվա առաջին երեսնօրյակում Ավետիսյան դպրոցի հևքն ու ոգին ներկայացրել էինք մեր կայքէջի նախորդ հրապարակումներով:
Իսկ այսօրվա լուսանկարային խճանկարը պատմում է այն մասին, թե այդ նույն սեպտեմբերին դասերից բացի էլ ինչով էին ապրում և ինչպիսի՛ն են ավետիսյանցիները՝ ուսուցիչ ու աշակերտ:
Հետևե՛ք մեր երթուղուն, և դուք մեզ հետ կհասնեք Դղեր ու Սուրբ Կարմրավոր, Գյումրի, Աշտարակ և Էջմիածին, Մատենադարանի հոգևոր պահեստարանից մինչև Բյուրականի աստղային երկինք ու բնության թանգարան, մինչև Սև բերդ ու Ամբերդ, մեր սրբավայրերից ու թանգարաններից մինչև Մաչանենց տուն…
Անցե՛ք մեզ հետ այդ ուղին, վերհիշե՛ք մեր պատմությունն ու քարտեզը, մշակույթն ու հոգևոր գանձերը: Քանզի հայրենիքը սիրում են՝ այն ճանաչելով:
