ԱՀԱԸ Երևանի Մալաթիա-Սեբաստիա համայնքում գործող Ավետիսյան կրթահամալիրը սիրով կընդունի պատերազմական իրադարձությունների պատճառով Երևանում ժամանակավորապես ապաստանած արցախցի դպրոցականներին ինչպես տարրական և միջին, այնպես էլ ավագ դպրոցում:
Մանրամասների համար զանգահարել 043002314 հեռախոսահամարով:
ԱՀԱԸ Երևանի Ավետիսյան կրթահամալիր և համայնքային կենտրոն
Ամերիկայի Հայ Ավետարանչական ընկերակցության հովանավորությամբ և Հայ Ավետարանական եկեղեցու Քրիստոնեական դաստիարակության բաժնի աշխատակիցների հետ Ավետիսյան կրթահամալիրի աշխատակազմը 10-րդ և 11-րդ դասարանների աշակերտների հետ համատեղ անդուլ աշխատեց չորս օր անընդմեջ: (ավելին …)
Հաղթանակը կռում են ամուր թիկունքով, իսկ հայոց բանակի թիկունքն այսօր ամուր է առավել, քան երբևէ: Սա է մեր հավատամքն ու կարգախոսը մեր ժողովրդի համար բախտորոշ այս օրերին, և Ավետիսյան կրթահամալիրը, համայն հայության հետ միասիրտ ու միակամ, անում է հնարավոր ամեն ինչ՝ հանուն Արցախի, հանուն հաղթանակի:
Առանց ուսումնական գործընթացը դույզն-ինչ խաթարելու, առանց իրարանցման, կազմակերպված և անաղմուկ, մի միասնական ընտանիքի պես գործի լծվեցին բոլորը՝ դպրոցի աշխատակազմը, աշակերտությունը և ծնողական հանրությունը: Բարձր դասարանների աղջիկները արագորեն պատրաստեցին վիրակապեր, նրանց դասընկերները մեծերի հետ տեսակավորեցին օգնության համար դպրոց հասցված առաջին անհրաժեշտության հագուստեղենն ու մթերքը, տղաները բարձեցին բեռնատարները՝ այդ ամենը ԱՀԱԸ հայաստանյան գրասենյակ, իսկ այնտեղից էլ՝ համակարգող կենտրոն անհապաղ հասցնելու համար:
Նյութական օժանդակությունից զատ՝ Ավետիսյան կրթահամալիրը հանուն Արցախի հանգանակեց 1 մլն 405 հազար ՀՀ դրամ:
2020թ. սեպտեմբերի 25-ին Ավետիսյան դպրոցի 12-րդ «ա» դասարանի աշակերտները դասղեկ Քրիստինե Գևորգյանի ուղեկցությամբ այցելեցին ՀՀ ԳԱԱ Էկոլոգոնոոսֆերային հետազոտությունների կենտրոն: Կենտրոնի տնօրեն Լիլիթ Սահակյանը նրանց ներկայացրեց էկոկենտրոնի պատմությունը, կառուցվածքը, յուրաքանչյուր ճյուղի հիմնախնդիրները:
Աշակերտները հարցեր տվեցին տնօրենին և զրուցեցին բնական հիմնախնդիրների շուրջ: Էկոկենտրոնի գիտաշխատողները երեխաներին պատմեցին շրջակա միջավայրի երկրաքիմիայի բաժնի կողմից կատարվող հետազոտությունների մասին, ծանոթացրին կենտրոնի սարքավորումներին և գործունեությանը:
Հատկապես հետաքրքրական էր վերջին սերնդի գերհզոր մանրադիտակի ուսումնասիրությունը: Աշակերտները մեծ ոգևորությամբ հետևեցին այդ մանրադիտակի օգնությամբ տերևի փոքր կտորի վրայի փոշու ուսումնասիրությանը, բացահայտեցին, թե ինչ տարրեր են մտնում նրա բաղադրության մեջ, և նույնիսկ ուսումնասիրեցին նրա կազմի մեջ մտնող մանր մասնիկների 3D պատկերները: Հպարտության առիթ էր այն, որ այդ սարքն այսօր գոյություն ունի ընդամենը երեք երկրներում: Վերջում աշակերտները մասնակցեցին նաև հողի նմուշառման աշխատանքներին:
Ինչպես գիտենք, մինչ այդ 12-րդ «ա» դասարանի աշակերտները կատարել էին ուսումնասիրություններ՝ Ավետիսյան դպրոցի էկոանձնագիրը ստեղծելու նպատակով: Այցելելով էկոկենտրոն՝ նրանք ձեռք բերեցին նոր գիտելիքներ և պատրաստվում են շարունակել ուսումնասիրությունները՝ համագործակցելով էկոկենտրոնի հետ:
Վաղ առավոտից տոնական երգն ու երաժշտությունը հուզումնալից մթնոլորտ են ստեղծել դպրոցի ընդարձակ բակում: Պահն ավանդական է՝ փուչիկներով, ծաղկեփնջերով, տոնական հարդարանքով: Բակում հավաքված փոքրիկների դեմքերին միախառնվել են ժպիտն ու հուզմունքը: Մի փոքր հեռվից ծնողները հետևում են իրենց բալիկներին:
Դպրոցի տնօրեն տիկին Մ. Գեղամյանը փոքրիկների ծնողներին ևս մեկ անգամ հիշեցնում է Երևան քաղաքի պարետի և առողջապահության նախարարի՝ նոր պայմանների վերաբերյալ հրահանգները, ծանոթացնում այդ կապակցությամբ դպրոցում իրականացված քայլերին, շնորհավորում ուսումնական տարեսկզբի կապակցությամբ և փոքրիկներին հրավիրում է ներս:
Ավետիսյան կրթահամալիրի ամբողջ ուսուցչակազմի ծափերի և ողջերթի բացականչությունների ներքո իրենց դպրոց առաջին անգամ ոտք են դնում 65 առաջինդասարանցիներ, իսկ նորաբաց Ավետիսյան քոլեջի նախակրթարան՝ 49 փոքրիկներ:
Սեպտեմբերի 14, անմոռանալի օր, Ավետիսյան դպրոց: Եվ ոչ մի համավարակ չի կարող մթագնել այս խանդավառ տրամադրությունը:
Բարի՜ երթ ուսման խորախորհուրդ ուղիներում, սիրելի՛ փոքրիկներ:
Սիրելի՛ աշակերտներ, ուսուցիչնե՛ր, անկախ նրանից, որ ուսումնական տարվա առաջին զանգը կհնչի սեպտեմբեր 14-ին՝ համաճարակով պայմանավորված մի շարք սահմանափակումներով, մարդկությունը միշտ կարեւորել է եւ 21-րդ դարում առավել ևս կարեւորում է գիտելիքը, ջանում այն օգտագործել ի բարօրություն հասարակության եւ մոլորակի մտավոր զարգացումը ներդաշնակեցնել հոգեւոր եւ մարմնական առողջությանը, կյանքում առաջնորդվել սիրո եւ համագործակցության մղումներով, որ մեր երեխաները վայելեն գիտության երջանկությունը, եւ ոչ թե դառնան նրա զոհերը:
Այո՛…. Նորից եկավ սեպտեմբեր, նորից աշնանամուտ է: Շնորհավորում եմ բոլորիդ նոր՝ 2020-2021 ուսումնական տարվա առթիվ, որը թևակոխում ենք` դարձած ավելի տոկուն, սեփական ուժերին ավելի վստահ:
Սեպտեմբերը ազդարարում է ուսումնական տարվա սկիզբը, որը նաև գիտելիքներով հարստանալու, իրական արժեքներ ճանաչելու և նոր նպատակներ կյանքի կոչելու սկիզբ է:
Տոնական այս օրը հատկապես առանձնակի ջերմությամբ ցանկանում եմ շնորհավորել բոլոր նրանց, ովքեր առաջին անգամ են ոտք դնում տարրական դպրոցի շեմին: Այս սեպտեմբերը թող դառնա նրանց լուսավոր ու մեծ ճանապարհի սկիզբը:
Նոր ուսումնական տարին պարտավորեցնող է բոլորիս համար, որովհետև կրթության բնագավառում իրականացվող բարեփոխումների հաջողությունը կախված է յուրաքանչյուրիս հետևողական աշխատանքից ու նվիրումից:
Հարգելինե՛րս, Ավետիսյան կրթահամալիրի ուսուցչական աշխատակազմը մինչև այս պահը անմնացորդ նվիրվածությամբ աշխատել է, որպեսզի այսօր մենք բարձր տրամադրությամբ ողջունենք ձեզ մեր կրթօջախում:
Որպես խթան նոր ուսումնական տարվա աշխատանքային տրամադրության` ուզում եմ խոսել նախորդ ուստարվա մեր ձեռքբերումների մասին:
Տարեկան արդյունքների ամփոփման տվյալներով դպրոցի գերազանց առաջադիմությամբ սովորողների թիվը 72 է, նրանցից 2-ը 12-րդ դասարանցիներ էին:
Մեր 16 շրջանավարտներից 14-ը հաջողությամբ հանձնել են միասնական քննություններ: Ավարտական քննությունների ընթացքում անբավարար արդյունք չի գրանցվել:
Պետական բուհեր են ընդունվել բոլոր մեր շրջանավարտները:
Թող այս ուսումնական տարին ևս լինի արգասաբեր, քանի որ մեր աշակերտներն ու ուսանողները որակյալ կրթությամբ են դնելու ոչ միայն սեփական կյանքի, այլև Հայաստանի ապագայի ամուր հիմքերը:
Հարգարժա՜ն ուսուցիչներ, կրթված քաղաքացին մեր ազգային արժանապատվության, մեր պետականության պահպանման, մեր երկրի զարգացման ու հզորացման, ազգային անվտանգության ապահովման կարևոր գործոնն է, որի երաշխավորը հանդիսանում եք դուք:
Տոնական այս օրը մեկ անգամ ևս առիթ է տալիս մեզ` կրթության գործընթացի բոլոր մասնակիցներիս` աշակերտից մինչև տնօրեն, վերագնահատելու գիտելիքի կարևորությունն ինչպես յուրաքանչյուր անհատի բարեկեցության, այնպես էլ մեր պետության զարգացման ու հզորացման գործընթացում: Կրթության ոլորտում համաշխարհային զարգացումներն այսօր հավաստում են, որ մեր կրթական համակարգի որակի և արդյունավետության բարձրացմանը միտված ծրագրերն այլընտրանք չունեն, ու բոլորիս ցանկալի արդյունքին հասնելու համար կարևորված է յուրաքանչյուրիս մասնակցությունը:
Իմ ջերմ շնորհավորանքներն ու բարեմաղթանքներն եմ հղում և ցանկանում, որ ուսումնառության ողջ ընթացքը մեր սաների համար լինի աշխարհաճանաչման ու ինքնադրսևորման լայն ճանապարհ: Յուրաքանչյուր աշակերտ մի ջահ է, որը պիտի բոցավառվի գիտելիքի նկատմամբ սիրով և սովորելու անսպառ ցանկությամբ:
Հետեւենք ՀՀ պարետի եւ առողջապահության նախարարության կողմից սահմանված կանոններին, որպեսզի մնանք առողջ եւ վերադառնանք բնականոն ուսումնական կյանքի:
Սիրելի՛ դպրոցականներ, անհրաժեշտ է, որ դուք նախևառաջ իմանաք ձեր սեփական լեզուն, մշակույթն ու պատմությունը, հպարտանաք մարդկային քաղաքակրթության մաս կազմող մեր հարուստ անցյալով և միշտ հիշեք, որ ձեր հայրենիքը Հայաստանն է, և ձեր ապագան պետք է կերտվի Հայաստանում, ձեր հայրենանվեր գործով, ձեր մտքի, տաղանդի ուժով, ստեղծագործ, արարող աշխատանքի շնորհիվ: Հիշե՛ք. իր հողի վրա ամուր կանգնած մարդու առջև բաց են լայնարձակ աշխարհի բոլոր հորիզոնները:
Եվս մեկ անգամ շնորհավորում եմ ուսումնական տարվա մեկնարկի կապակցությամբ: Մեզ բոլորիս ցանկանում եմ անամպ երկինք, անձնուրաց նվիրվածություն մեր ազատ ու անկախ հայրենիքի հզորացման գործում, հետաքրքիր հայտնություններով հարուստ ու հաջողություններով լի տարի, ուժ, կորով և առողջություն այդ առաքելությունն իրականացնելու ճանապարհին:
Բարի՛ երթ և բազում հաջողություններ նոր՝ 2020 — 2021 ուսումնական տարում:
Մելանյա Գեղամյան
Ավետիսյան դպրոցի տնօրեն, մ.գ.թ.
