Գրքի համաշխարհային օրը համարվում է ապրիլի 23-ը. այդ օրը ողջ աշխարհում մարդիկ միմյանց գրքեր են նվիրում, հարստացնում գրադարանը նորանոր օրինակներով:
Այդ օրը տոն է բոլոր գրքասերների, գրականություն սիրողների, գիրքը գնահատողների համար:
Հայաստանի Հանրապետությունում գրքի տոնը նշվում է ամենայն հայոց բանաստեղծի ծննդյան օրը՝ փետրվարի 19-ին:
Փետրվարի 19-ը տոնական էր նաև Խորեն և Շուշանիկ Ավետիսյանների կրթահամալիրում:
Դպրոցի բոլոր դասարանները գունագեղ, բազմաբովանդակ ու բազմաժանր գրքեր նվիրեցին դպրոցի գրադարանին: Կրթահամալիրի տնօրեն Մ. Գեղամյանը ևս գրքեր նվիրեց գրադարանին՝ պատգամելով աշակերտներին գիրքը դարձնել կյանքի մշտական ուղեկից:
Տարրական մասնախումբը դպրոցի գրադարանին նվիրեց 2-րդ դասարանի «Այբբենարան» ուսումնական ձեռնարկի 45 օրինակ:
Գրադարանը հարստացավ հայ և համաշխարհային գրականության լավագույն նմուշներով. Օսկար Ուայլդի, Էրիխ Մարիա Ռեմարկի, Ռիչարդ Բախի, Ջեկ Լոնդոնի, Ջեյն Օսթինի, Ալֆոնս Դոդեի, Շիրվանզադեի, Գուրգեն Մահարու, Հովհաննես Թումանյանի երկերը հարստացրին գրքերի անսահման աշխարհը:
Գրքերը մտքի նավեր են. նավարկեք իմաստության հորձանուտում և կգտնեք բազում թաքնված գանձեր:
