Նյմ 9, 2021 | Մեր առօրյան
Ավետիսյան դպրոցում շարունակվում է ուսուցիչների վերապատրաստման, մասնագիտական աճի և կատարելագործման ընթացքը։ Այս ընթացքի մեջ, կրթության մասնագետ, Ավետիսյան դպրոցի կրթության խորհրդատու տիկին Սալբի Ներսեսսյանը, այս տարի էլ, ինչպես նախորդ տարի, սեմինարներ է անցկացնում ուսուցչակազմի հետ:
Նոյեմբերի 4-ին, Ավետիսյան կրթօջախի մանկավարժների համար տիկին Ներսեսսյանն անցկացրեց սեմինար՝ «Լինել ուսուցանվող ուսուցիչ» խորագրի ներքո:
Սեմինարավարը հանգամանորեն կանգ առավ մանկավարժության արդյունավետությունն ապահովող գործոնների վրա, որոնցից առանձնացրեց և մանրակրկիտ ներկայացրեց ուսուցչի համար հույժ կարևոր ազդակը՝ մշտապես և անընդմեջ սովորելու պատրաստակամությունը: Տիկին Ներսսեսյանը նշեց, որ հոյակապ ուսուցիչները երբեք չեն դադարում սովորել, և դա անհերքելի է։ Իսկ ուսուցչի համար ի՞նչ է նշանակում լինել ուսուցանվող: Դա մանկավարժի պատրաստակամությունն է բաց լինելու, լսելու, սովորելու և սովորածը կիրառելու: Այդ գործընթացի արդյունքում է փոխվում, մասնագիտորեն աճում և կատարելագործվում ուսուցիչը:
Տիկին սեմինարավարն իր ասելիքը համեմում և հիմնավորում էր պերճախոս և ազդեցիկ օրինակներով: Դրանցից ամենատպավորիչը Հիսուսի օրինակն էր:
Հիսուսն, իրոք, հրաշալի ուսուցիչ էր: Եվ նրա «Սերմնացանի առակով» իր խոսքը նպատակակետին հասցրեց տիկին Ս. Ներսեսսյանը: Չորս տարբեր հողերի մեջ ընկան սերմնացանի ցանած սերմերը, ասել է թե՝ չորս տարբեր սրտերի մեջ,- համեմատություն անցկացրեց նա,- և դրանց հիմնական տարբերությունն այն էր, թե որքանով էին դրանք «պատրաստակամ՝ ստանալու, սովորելու, փոխվելու և աճելու համար»:
Հիսուսի առակում առաջին երեք հողերը ներկայացնում են այն մարդկանց, ովքեր պատրաստ և պատրաստակամ չեն ստանալու, սովորելու, փոխվելու և աճելու: Ճամփեզրին, ապառաժի վրա և փշերի մեջ չկար այն հողը, որտեղ սերմը կարող էր ծլարձակել և աճել, և միայն չորրորդ՝ պարարտ հողում էր, որ սերմը «հարատևելով պտուղ էր տալիս, կար որ մեկին` հարյուր, և կար որ մեկին` վաթսուն…»:
Այդպես է և այսօր. եթե ուզում ենք կյանքում հաջողակ լինել, պետք է պարարտ, լավ հողի պես լինենք, պետք է լինենք ուսուցանվող: Հատկապես՝ ուսուցիչները:
Ուսուցանվող մարդիկ բաց են սովորելու, բաց են փոխվելու և աճելու՝ հիմնվելով սովորածի վրա: Նրանք պտուղ են տալիս, այսինքն՝ ինչ-որ լավ բան են անում մարդկության համար:
Ավետիսյան դպրոցի մանկավարժների համար թեման սրտամոտ էր և հրատապ: Տիկին Ս. Ներսեսսյանը սիրով մեկնաբանություններ տվեց մտքերի փոխանակություն ընթացքում ծագած հարցադրումներին:
Ուսումնական այս տարվա ընթացքում, ուսուցիչներին համար նախատեսվում են հաճախակի սեմինարներ:
Նյմ 1, 2021 | Մեր առօրյան
Երևանյան աշնան ամենաջերմ ամիսը՝ հոկտեմբերը, խոնարհաբար իր տեղը զիջեց անձրևաշատ նոյեմբերին: Իսկ մինչ այդ ավետիսյանցիները հասցրին լիովին վայելել հոկտեմբերի արևոտ ակնթարթները:
«Սերունդ» մանկական սրճարանում այսօր տոն է, «Ա» տառի, այսինքն՝ և I «գ» դասարանի տոնը, որն ուղեկցվեց զվարճալի խաղերով, պարերով, հայոց այբուբենի առաջին տառին նվիրված ոտանավորներով,«Այբ, բեն, գիմ» երգով, նաև «Ա» -ով թխվածքաբլիթներ համտեսելով: Դասվար Սիրանուշ Սարգսյանը և մյուս մեծերը հավասարապես ուրախացան այս պայծառ տոնով:
Իսկ այդ նույն ժամանակ XI-ցիները ԳԱԱ էկոլոգանոոսֆերային հետազոտությունների կենտրոնում իրենց ուսուցչուհու՝ Քրիստինե Գևորգյանի ղեկավարությամբ խորացել էին բնապահպանության գիտական ոլորտների մեջ:
Մեզնից ո՞վ չի մեծացել Ամենայն հայոց բանաստեղծի հեքիաթներով ու բանաստեղծություններով: Իսկ III «ա» դասարանի փոքրիկները դասվար Ռուզան Մարգարյանի ուղեկցությամբ բարձրացան մեծ բանաստեղծի թանգարանի 54 աստիճաններով, «տեսան» Թումանյանի Լոռին ու Դսեղը, հեքիաթների նկարազարդումները: Ամենից գրավիչը, իհարկե, թումանյանական թեմաներով մուլտիպլիկացիոն ֆիլմերն էին, որոնք երեխաները դիտեցին շունչները պահած:
Իսկ VII «գ» դասարանը «Եղիշե Չարենց» ծրագրային թեման ամփոփելուց հետո այցելեց Չարենցի տուն-թանգարան: Այցն անչափ հետաքրքիր էր, անմոռաց: Դասղեկ և հայոց լեզվի և գրականության ուսուցչուհի Նվարդ Գրիգորյանի սաները թանգարանի աշխատակիցներին հիացրին հանճարեղ բանաստեղծի կյանքի և ստեղծագործության իրենց իմացությամբ:
VIII «ա» դասարանի դասղեկ Նարինե Մելիքյանի առաջարկով նրա սաները մայրաքաղաքի օրն անցկացրին քաղաքապետարանի Երևանի պատմության թանգարանում և վերադարձան անմոռանալի տպավորություններով:
Թատերարվեստի երկրպագու VIII «բ» դասարանը մի հրաշալի երեկո անցկացրեց Սոս Սարգսյանի անվան Համազգային թատրոնում: Ա. Սիմոնյանի «44 աստիճանի վրա» դրաման մինչև վերջին վայրկյանը երեխաները դիտեցին հուզախառն և հափշտակված: Չդադարող ծափահարություններից հետո էլ նրանք անմիջապես չցրվեցին, այլ հենց թատրոնի մուտքի մոտ դասղեկ Զարուհի Ավետիսյանի հետ քննարկում էին ներկայացումը, որի ժամանակ աղջիկներից ոմանք նույնիսկ լաց էին եղել…
Ինչպե՞ս է ստեղծվել հայ գիրքը, ովքե՞ր են եղել առաջին հայ տպագրիչները, ի՞նչ ճանապարհ է անցել սիրված գիրքը մինչև իրենց հասնելը: Այս և նման բազմապիսի հարցերի պատասխանն ստացան II «բ» դասարանի աշակերտները, որոնք դասվար Լալա Սահակյանի հետ անցան գրատպության թանգարանի սրահներով, տեսան «Ուրբաթագրքի» օրինակը, հայերեն տպագիր առաջին քարտեզը և բազմաթիվ այլ հետաքրքիր նմուշներ, ուշիուշով հետևեցին ուղեվարի բացատրություններին:
Հոկտեմբերի վերջին կիրակին Գյումրու օր էր VIII «գ» դասարանի համար: Նրանք դասղեկ Լուսինե Մարգարյանի հետ ոտքով կտրեցին-անցան մեր Երկրորդ քաղաքի հնամենի փողոցները, լուսանկարվեցին սիրված կինոնկարներից իրենց հայտնի վայրերում, այցելեցին մեծ բանաստեղծների՝ Ավետիք Իսահակյանի և Հովհաննես Շիրազի տուն-թանգարանները, սիրված դերասան Մհեր Մկրտչյանի թանգարանը: Շրջագայության վերջում նրանք փոքրիկ համերգ տվեցին հանրահայտ Սև բերդի հսկայական «բեմահարթակում»: Նրանց երգ ու նվագն արձագանքվում էր պատմական ամրոցի կամարները տակ և տարածվում մինչև Յոթվերք և ավելի հեռու:
Հկտ 22, 2021 | Մեր առօրյան
ԵՐԵՎԱՆ-2803
Երևանի անցյալը, ներկան ու ապագան, ասես միաձուլված, սփռվել էին պատանիների հիացական հայացքների ներքո:
Միշտ հին ու նոր Երևանի թանգարանում
Մայրաքաղաքի տարեդարձին էր նվիրված Ավետիսյան դպրոցի 8-րդ «ա» դասարանի էքսկուրսիան դեպի Երևան քաղաքի պատմության թանգարան: Դասղեկ Նարինե Մելիքյանի հետ նրանք շրջեցին թանգարանի սրահներով, դիտեցին թանգարանում պահվող որմնանկարները, սեպագիր արձանագրությունները, հնագիտական հավաքածուները, բազմաթիվ այլ առարկաներ, որոնք խոսուն վկան են մեր մայրաքաղաքի հարուստ հնագույն անցյալի, արտացոլում մեր ժողովրդի բազմադարյա մշակույթը, հոգևոր կյանքն ու գեղարվեստական բարձր ճաշակը: Պատանի ավետիսյանցիները ուշիուշով լսում էին թանգարանի աշխատակցի բացատրությունները, նրան ուղղում տարաբնույթ հարցեր:
Ինչպես և ակնկալվում էր, հատկապես ուշագրավ էր հին Երևանի մանրակերտը, որի համայնապատկերը պատանիներին տարավ 100 տարով ետ՝ շրջելու հին մայրաքաղաքի թաղամասերով ու փողոցներով, տեսնելու նրա եկեղեցիներն ու այգիները: Երևանի անցյալը, ներկան ու ապագան, ասես միաձուլված, սփռվել էին պատանիների հիացական հայացքների ներքո:
Երևանի քաղաքապետարանում ութերորդցիներին սպասում էր ևս մեկ հաճելի անակնկալ. նրանց այցը համընկավ գեղանկարիչ Սուրեն Խորենյանի գործերի ցուցահանդեսի բացման հետ: Անվանի նկարիչ Վահան Խորենյանի և սիրված երգչուհի Ֆլորա Խորենյանի որդին՝ Հայաստանի նկարիչների միության, ՅՈՒՆԵՍԿՕ-ի նկարիչների միջազգային ընկերակցության անդամ Սուրեն Խորենյանը «Ծաղիկներ» խորագրով իր այս ցուցադրությունը նվիրել էր մեր հերոսների հիշատակին:
Հկտ 21, 2021 | Մեր առօրյան
Այսօր՝ հոկտեմբերի 21-ի կեսօրին, բահերի, քլունգների և դույլերի զնգոցն էր իշխում Ավետիսյան դպրոցի չորս կողմում: Ավագ դպրոցի սաները Ասիական զարգացման բանկի Հայաստանի ներկայացուցչության և դպրոցի վաղեմի բարեկամ ու գործընկեր Armenia Tree Project (Հայաստան ծառատունկ) ծրագրի ներկայացուցիչների հետ կրթօջախի շրջակայքի ծառածածկը հարստացրին ևս 50 տնկիներով. տնկարկվեցին 25-ական գիհի և եղևնի:
Հողային աշխույժ աշխատանքից հետո պատանի ավետիսյանցիները հայերենով ու անգլերենով հյուրերին ներկայացրին սիրելի դպրոցի ներսակողմը:
2014 թվականին դպրոցի նոր շենքի շահագործումից հետո սա վեցերորդ ծառատունկն էր նրա շրջակայքում: Կանցնեն ոչ շատ տարիներ, և Ավետիսյան կրթօջախ մտնողներին կդիմավորի կանաչախիտ պուրակը:
Համատեղ ծառատունկի լուսանկարները՝ հաջորդիվ:
Հկտ 18, 2021 | Մեր առօրյան
Արդեն 10 տարի է, ինչ ՀՀ ԳԱԱ էկոլոգանոոսֆերային հետազոտությունների կենտրոնում գործում է ՅՈՒՆԵՍԿՕ-ի «Կրթություն հանուն կայուն զարգացման» ամբիոնը, որի ուշադրության առանցքում ոչ ֆորմալ կրթությունն է: Վերջերս Ավետիսյան դպրոցի 11-րդ դասարանի աշակերտները «Բնօգտագործում» առարկայի ծրագրի շրջանակներում իրենց ուսուցչուհի Քրիստինե Գևորգյանի ղեկավարությամբ այցելեցին էկոլոգանոոսֆերային հետազոտությունների կենտրոն, որտեղ իրականացվում են կիրառական և հիմնարար ուսումնասիրություններ՝ ուղղված շրջակա միջավայրի պահպանությանը, սննդի անվտանգությանը, գյուղատնտեսության և բնապահպանության այլ ոլորտների:
Ավետիսյան դպրոցի բնապահպանների պատվիրակներին ջերմորեն ընդունեց կենտրոնի տնօրեն Լ. Սահակյանը և իր գործընկերների հետ մեկտեղ նրանց ծանոթացրեց կենտրոնի՝ բնապահպանական ոլորտին առնչվող գիտական հետազոտություններին, հեռազննման և տեղեկատվական նորագույն տեխնոլոգիաների օգնությամբ օդատիեզերական մեթոդի կիրառման հմտություններին:
Հկտ 8, 2021 | Մեր առօրյան
Ավետիսյան դպրոցի ավագ դպրոցի աշակերտները և ուսուցչակազմը հյուրընկալեցին ամերիկահայ գրող, հրատարակիչ, գրականագետ-մատենագետ, թարգմանիչ, մանկավարժ, հետազոտող գիտնական և բարերար Հովսեփ Նալբանդյանին (Յովսեփ Նալպանտեան)։
Սա սփյուռքահայ մտավորականի և հասարակական գործչի հետ երկրորդ այցն էր Ավետիսյան դպրոց: Հյուրը դատարկաձեռն չէր եկել: Շարունակելով իր շրջայցը հանրապետության մարզերի և մայրաքաղաքի ուսումնական հաստատություններ՝ նա կատարում է հայության երկու հատվածները միացնող մշակութային դեսպանորդի՝ կամովին ստանձնած իր առաքելությունը. տարբեր լսարանների առջև ելույթ է ունենում պատմության, մշակույթի, ազգային հարցերի, Սփյուռքի և հայրենիքի տագնապների վերաբերյալ ելույթներով, ինչպես նաև նվիրում է իր հեղինակած գրքերից: Ի դեպ, վերջին երկու տասնամյակի ընթացքում Արցախում և Հայաստանում նրա նվիրաբերած գրքերի թիվն անցնում է 11 հազարից:
Այս անգամ նա նախ՝ ներկայացրեց, ապա՝ Ավետիսյան դպրոցի գրադարանին նվիրեց իր հեղինակած 10 անուն գիրք, որոնց թվում նաև «Լույս» վեցհատորյա հանրագիտակի երկու հատորը:
