Նոր զարթոնքը՝ նաև արվեստով. Ավետիսյանի բեմում էր «Արեգնազանի» նվագախումբը

Փտր 6, 2021 | Մեր առօրյան

Մոտալուտ գարնան շունչը վերստին թևածեց Ավետիսյան դպրոցի դահլիճում: Տագնապալի ու ծանր ամիսներից հետո այստեղ կենարար երաժշտության իսկական տոն դարձավ «Արեգնազան» կրթահամալիրի նվագախմբի համերգը: Ավագ դպրոցի սաներից կազմված 15-հոգիանոց երաժշտախումբը, որի կազմի մեջ էին թավջութակից մինչև ջութակ, կիթառ, ֆլեյտա, չխկչխկան ու հարվածային գործիքներ, նվագավար Արթուրի հետ ավետիսյանցիներին առաջնորդեց երաժշտական յուրահատուկ ճամփորդության՝ ներկայացնելով իռլանդական, չեխական, հինգալիական և  այլ ժողովուրդների երաժշտություն: Պատանի հանդիսատեսները մասնակցեցին բեմ-դահլիճ երաժշտական վիկտորինային: Համերգային հարուստ ծրագրում, անշուշտ, հնչեց նաև անզուգական Կոմիտաս:

Դահլիճը ջերմորեն ընդունեց նվագախմբի ելույթը: Իր հերթին «Արեգնազան» կրթահամալիրի աշխատակից Արա Աթայանը, դիմելով ավետիսյանցիներին, ասաց, տպավորված է նրանց ընդունելությունից, որ այսպիսի լավ հանդիսատես կերազեր ամեն մի երաժշտախումբ:

Համերգի ավարտին Ավետիսյան դպրոցի տնօրեն Մելանյա Գեղամյանը հյուրերին նվիրեց «Աշխարհի հայ երաժիշտները» պատկերազարդ գիրքը, ինչպես նաև «Ավետիսյան դպրոց» գիրք — ալբոմը:

Պատանի երաժիշտները բեմից հեռացան հոտնկայս բուռն ծափահարությունների ներքո:

Ավետիսյան կրթահամալիրը հյուրընկալել էր մասնավոր դպրոցների տնօրեններին

Հնվ 29, 2021 | Մեր առօրյան

Համաձայն ԿԳՄՍՆ Կրթական տեխնոլոգիաների ազգային կենտրոնի (ԿՏԱԿ) կայքի տվյալների՝ ՀՀ-ում մասնավոր դպրոցներում սովորում է 9700 աշակերտ։

2021 թվականի հունվարի 27-ին Խորեն և Շուշանիկ Ավետիսյանների անվան դպրոց և համայնքային կենտրոնում տեղի ունեցավ հանդիպում անկախ դպրոցների «Մեկ ձայն» հայկական ասոցիացիայի հիմնադիրների և մայրաքաղաքի 33 մասնավոր դպրոցների տնօրենների հետ:

Հիմնադիրները հրավիրվածներին ներկայացրին վերջերս մամուլում հրապարակված անկախ դպրոցների «Մեկ ձայն» հայկական ասոցիացիայի հայտարարությունը։ Հայտարարության մեջ նշվում է, որ ՀՀ կառավարությունը 2021 թ․ մայիսին պետք է հանդես գա օրենսդրական փոփոխությունների փաթեթով, ըստ որի՝ հանրակրթություն և բարձրագույն կրթություն իրականացնող հաստատությունների գործունեությունը պետք է հարկվի ավելացված արժեքի հարկով (ԱԱՀ)։

Հիմնադիրները մտահոգություն արտահայտեցին առ այն, որ օրենսդրական այդ փոփոխությունը ընդունվելու դեպքում հարկային լուրջ բեռ կդառնա մասնավոր դպրոցների համար, և շատ կրթական հաստատություններ պարզապես կփակվեն։

Մեկ հարց է, թե արդյունավետ է արդյոք այդ փոփոխությունը պետական տնտեսական քաղաքականության տեսանկյունից, մեկ այլ հարց՝ արդյոք այդ փոփոխության մեջ հաշվի է առնվել մասնավոր կրթական հաստատությունների ունեցած ներդրումը հանրապետությունում կրթական միջավայրի զարգացման գործում։

Առհասարակ, մասնավոր դպրոցների դինամիկ ակտիվությունը, որը նկատելի է վերջին տարիներին, երկրում կրթական համակարգի կայացման անհրաժեշտ պայման է։ Որպես կանոն, մասնավոր դպրոցներն այս կամ այն ձևով առաջարկում են այլընտրանքային մոտեցումներ։ Ժամանակի ընթացքում կրթական այլընտրանքային ծրագրերը հղկվում, ամրանում և ավելի մեծ տարածում են գտնում հանրության շրջանում, ինչն իր հերթին բովանդակային և մեթոդաբանական առողջ մրցակցության խթան է դառնում։ Ընդ որում կրթական այդ նոր որակի հարաբերությունը չի սահմանափակվում միայն մասնավոր դպրոցներով. այն աստիճանաբար սկսում է առնչվել նաև պետական կրթական հաստատություններին։

Այսպես, մասնավոր դպրոցների ձևավորմանն ու կայացմանը զուգահեռ, փոխվում են հանրության ակնկալիքները կրթությունից։ Նոր ձևավորվող պահանջարկը նոր մարտահրավերներ է ստեղծում տարիներ շարունակ ստատիկ վիճակում գտնվող հետխորհրդային կրթահամակարգի համար, որը սկսում է արդիականացման ուղիներ փնտրել։ Այս առումով պատահական չէր նախորդ տարի առաջարկված նոր կրթական չափորոշիչներում մասնավոր դպրոցների մեթոդաբանական և ռազմավարական փորձի ներառումը։

Նման գործընթացի ապահովման էական բաղադրիչներ են ինչպես արդեն երկար ժամանակ գործող խոշոր մասնավոր դպրոցների վարկանիշի տարածումը, այնպես էլ վերջին ժամանակներում նկատելի նոր փոքր ու մասնագիտացված կրթօջախների ստեղծումը։ Կոնկրետ ուղղվածությամբ մասնագետներ պատրաստող այս հաստատությունները մեծապես նպաստում են նաև աշխատաշուկայի կայացմանը։ Մինչդեռ սպասվող որոշումը մեծ վնաս կհասցնի հատկապես փոքր մասնավոր կրթօջախներին, քանի որ իրենց ձևավորման նախնական փուլում մասնավոր դպրոցները մեծ ծախսեր են պահանջում։

Ելույթներից հետո արծարծվեցին ներկաներին հուզող հարցեր, քննարկվեցին մասնավոր սեկտորի առջև ծառացած խնդիրները, որից հետո որոշում կայացվեց դիմել ՀՀ ԿԳՄՍ, Էկոնոմիկայի և Ֆինանսների նախարարներին՝ նրանց վերոհիշյալ հրատապ խնդիրը ներկայացնելու առաջարկով:

Հանդիպման ավարտին Ավետիսյան դպրոցի տնօրեն տիկին Մելանյա Գեղամյանը ավագ դպրոցի սաների ուղեվարությամբ հյուրերի համար կազմակերպեց շրջայց դպրոցում:

Մեր հյուրն էր Րաֆֆի Քասսարջյանը

Հնվ 27, 2021 | Մեր առօրյան

Անհնար է պատկերացնել 21-րդ դարն առանց բարձրագույն տեխնոլոգիաների նվաճումների կիրառման կյանքի ամենատարբեր ոլորտներում, և այդ առումով այսօր մեր երկրին օդ ու ջրի պես անհրաժեշտ է բարձր տեխնոլոգիաների որակյալ մասնագետների բանակ ձևավորելը: Ոլորտ, որը սահմանային, ճանապարհային կամ որևէ այլ արգելք ընդհանրապես չունի, որը մտքի, գաղափարի ու մտահղացման անսահմանափակ ասպարեզ է:

Ինչպիսի՞ զարգացումներ կան Հայաստանի Հանրապետությունում, և դրանցում ի՞նչ տեղ ու դեր ունեն բարձր տեխնոլոգիաները, ի՞նչ հարցեր կարելի է լուծել դրանց կիրառմամբ, ի՞նչ հորիզոններ է բացում սովորող երիտասարդության առջև նորագույն տեխնոլոգիաներին տիրապետելը, այդ առումով ի՞նչ եզրահանգման բերեց արցախյան վերջին ազատամարտը, ո՞րն է հայկական արդի իրողությունների թելադրանքը:

Ավետիսյան դպրոցի բարձրդասարանցիներին հետաքրքող այս և այլ հարցերի հանգամանորեն պատասխանեց առաջատար տեխնոլոգիաների ձեռնարկությունների միության (ԱՏՁՄ) գործադիր տնօրեն Րաֆֆի Քասսարջյանը, որն այսօր կրթօջախ էր այցելել Ամերիկայի Հայ Ավետարանչական ընկերակցության (ԱՀԱԸ) Հայաստանի մասնաճյուղի հրավերով: Հյուրը պատմեց ԱՏՁՄ «Արմաթ» ինժեներական լաբորատորիայի գործունեության, ինժեներական կրթությունը դպրոցականներին հասանելի դարձնելու ուղղությամբ ձեռք բերված հաջողությունների, նաև իր անցած ուղու մասին:

Րաֆֆի Քասսարջյանը հատկապես կարևորեց 21-րդ դարի բանակի արդիականացումը, վաղվա զինակոչիկին նորագույն գիտելիքներով զինելը, այլ ծրագրերի հետ համագործակցելու հեռանկարները, ներկայացրեց բարձր տեխնոլոգիաները կիրառման լայնարձակ հորիզոնները՝ հոգեբանությունից, ռադիոլոգիայից, բժշկությունից մինչև կենցաղ և մարքեթինգ, տեղեկատվական տեխնոլոգիաներ և համաշխարհային ասպարեզ…

Ի պատասխան դահլիճից հնչած «Ինչի՞ց սկսել» հարցի՝ Ր. Քասսարջյանը բարձրդասարանցիներին խորհուրդ տվեց հաճախ մասնակցել ամենաբազմազան մրցույթների, ծրագրերի, խմբակների, հնարավորինս լավ տիրապետել օտար լեզուների:

Հանդիպումից հետո դպրոցի տնօրեն Մելանյա Գեղամյանի, ԱՀԱԸ Հայաստանի ներկայացուցիչ Հարութ Ներսեսսյանի և Ավետիսյան դպրոցի կոորդինացիոն խորհրդի անդամ Ռուբեն Կրիկյանի ուղեկցությամբ պատվավոր հյուրը շրջագայեց դպրոցի սրահներում, ծանոթացավ կրթական հնարավորություններին և պայմաններին:

Պարոն Րաֆֆիի հետ հաջորդ հանդիպմանը, ինչպես հույս հայտնեց տիկին Մ. Գեղամյանը, բարձր տեխնոլոգիաներով հետաքրքրված բարձրդասարանցիներն արդեն կներկայանան իրենց խիստ որոշակի հարցադրումներվ:

Մի կարևոր փաստ. 2011 թվականից մինչև օրս ՀՀ-ում, Արցախում և Վրաստանում՝ Ջավախքում, գործում են 575 «Արմաթ» ինժեներական լաբորատորիաներ, որոնց շնորհիվ անվճար ինժեներական կրթություն են ստանում շուրջ 15 հազար երեխա։
 

Քրիստոս ծնվեց եւ հայտնվեց. ձեզ եւ մեզ մեծ Ավետիս: Օրհնյալ է ծնունդը Քրիստոսի

Հնվ 1, 2021 | Մեր առօրյան

Սիրելի՛ ավետիսյանցիներ, գործընկերներ, ծնողներ, աշակերտներ, ահա եւ ավարտվեց 2020 թվականը:

Յուրաքանչյուր տարի հայկական ավանդույթի համաձայն՝ Ամանորի և Սուրբ ծննդյան առիթով միմյանց շնորհավորում և բարեմաղթանքներ էինք հղում, սակայն, անցնող տարին այնպիսի հարված հասցրեց մեր ազգին ու պետությանը, որ բառեր չեմ գտնում արտահայտելու հոգուս հույզերի հեղեղը։

Մարդիկ այսօր, առավել քան երբեւէ, հաղորդակցության կարիք ունեն։ Ծանր ժամանակներն ստիպում են մեզ ավելի խմբվել, զգալ կողքինի շունչն ու ներկայությունը։

«Շնորհավորում եմ» բառը չեմ կարողանում արտաբերել։ Պապանձվելու տարեմուտ էր… Մեր հերոսների շնորհիվ է, որ մենք կանք ու լինելու ենք դեռ աշխարհի քարտեզի վրա… Սիրտս կարծես դարձել է Եռաբլուրի հերթական խորշը։ Եռաբլուրը դարձել է մեր ցավի ամփոփումը: Այնտեղ հանգչող հազարավոր հայորդիների աճյուններից է հառնելու Հայի տաճարը։ Այնտեղ, ողբերգությունից կարծրացած հողի վրա թափվող արցունքների բյուրեղներն են լինելու Հայի հետագա գոյության Լույսը։

Տա Աստված, որ 2020-ի թողած ծանր ու անդառնալի կորուստներից, մեզ պատած անասելի վշտից կարողանանք ուժ գտնենք, որ որբի եւ ողբի հայրենիքը դարձնենք հզոր Հայաստան:

Այսօր մենք պետք է առավել քան երբեւէ դրսևորենք աննկուն կամք ու վճռականություն, համախմբվենք ազգային արժեքների և կրթության կարեւորության գաղափարի շուրջ: Պետք է մեր մեջ ուժ գտնենք, որպեսզի 2021 թվականին կարողանանք վերականգնել մեր ոտնահարված արժանապատվությունը, վերագտնենք հայի նկատմամբ եղած վստահությունն ու հարգանքը։ Անհրաժեշտ է վերականգնենք մեր խարխլված հավատը, որպեսզի միասին դիմակայենք բազում մարտահրավերների, քանզի հայրենափրկության գործը բոլորինս է և միասնականություն է պահանջում Հայաստանում, Արցախում եւ Սփյուռքում։

Թող Քրիստոսի Ծննդյան լույսը ուժ եւ հավատ ներշնչի բոլորիս՝ դուրս գալու այս դառը մղձավանջից։ Թող Նոր 2021 թվականը մեզ բերի խաղաղություն, առողջություն եւ հաջողություն:

Մելանյա Գեղամյան
Ավետիսյան դպրոցի տնօրեն, մ.գ.թ.

Սեմինար-դասընթաց դասվարների համար

Դկտ 25, 2020 | Մեր առօրյան

«Ուսուցիչ պարոննե՛ր ու քույրե՛ր, զգուշությամբ ու երկյուղածությամբ մոտեցեք դաստիարակության գործին. խիստ փափուկ պաշտոն մըն է ձերը։ Դաստիարակելու կոչված եք սերունդ մը, որ ապագա ազգն է։ Սխալ ուղղությամբ՝ ազգ մը կը խորտակեք վերջը». ԿՈՄԻՏԱՍ:

Մեծն Կոմիտասի թևավոր դարձած այս խոսքը Ավետիսյան դպրոցի գործունեության առաջնային սկզբունքներից մեկն է, որը պահանջում է ամենայն զգուշություն և նրբավարություն ցուցաբերել մանուկ սերնդի հետ աշխատելու ընթացքում: Քանզի այսօր դաստիարակվող սերնդի որակական, մտավոր և բարոյական հատկություններով է պայմանավորված մեր ազգի ապագան: Ելակետային այս դրույթից բխեցնելով կրթօջախի տեսլականի առաջնայնությունները՝ Ավետիսյան դպրոցի կոորդինացիոն խորհուրդը որոշում կայացրեց , որ 2020-2021 ուսումնական տարին դառնա Ամբողջական կրթության սկզբունքները որդեգրելու մեկնարկային տարի:

Այդ նպատակն իրագործելու հեռանկարով Ավետիսյան դպրոցի կրթության խորհրդատու նշանակվեց կրթության ոլորտի կայացած մասնագետ տիկին Սալբի Ներսեսսյանը: Նա պատասխանատու է Ամբողջական կրթության սկզբունքները սերմանելու և այն կրթահամալիրում գործնականապես կիրառելու գործընթացում կրթօջախի անձնակազմին և ուսուցչակազմին աջակցելու գործում:

Ամբողջական կրթության կիրառման գործում կարևորելով մանկավարժների վերապատրաստումը՝ տիկին Ս. Ներսեսսյանը ձեռնարկեց զանազան սեմինար-դասընթացներ, որոնք արդեն ընթացքի մեջ են: Դրանց առաջին փուլը նվիրված էր 2-րդ և 3-րդ դասարանների դասվարներին, և նյութը դարձյալ Ամբողջական կրթությունն էր: Երկու մասից կազմված այս սեմինարն անցկացվեց 2020 թ. հոկտեմբերի 21-ին և 22-ին: Այդ հանդիպումների ընթացքում մասնագետը համապարփակորեն ներկայացրեց Ամբողջական կրթության էությունը, ընդգծեց 21-րդ դարում դրա անհրաժեշտությունը, ինչպես նաև խոսեց Ամբողջական կրթության հիմնական առանձնահատկությունների մասին:

Տիկին Ս. Ներսեսսյանը սեմինարն ավարտեց Կոնֆուցիուսի հետևյալ խոսքերով. «Եթե մտածում եք 1 տարվա կտրվածքով, ապա սերմ տնկեք. եթե 10 տարի ժամկետով, ծառ տնկեք, եթե 100 տարի ժամկետով, ապա սովորեցրեք ժողովրդին»:

Եվ մենք շատ լավ գիտենք, որ այսօր մեր հայ դպրոցի նպատակը մեկն է՝ ճշմարիտ դաստիարակությամբ ձևավորել լավ մարդ և քաղաքացի: