Մյս 16, 2016 | Մեր առօրյան
Մայիսի 13-ին Մալաթիա-Սեբաստիա վարչական շրջանի թաղապետարանի դահլիճում շրջանի դպրոցների միջև անցկացվեց երգի-պարի մրցույթ՝ «Ես զինվորն եմ քո» խորագրով, որին մասնակցեցին նաև «Հայ կրթություն» կրթական հիմնադրամի Խորեն և Շուշանիկ Ավետիսյանների անվան կրթահամալիրի շնորհալի աշակերտները: Նրանցից Մանե Եղոյանը պարային համարի գեղեցիկ կատարման համար արժանացավ «Ժյուրիի համակրանք» անվանակարգին, իսկ Ռոբերտ Գևորգյանը ռազմահայրենասիրական երգը բարձր մակարդակով ներկայացնելու համար գրավեց մրցանակային երրորդ տեղը:
Մյս 16, 2016 | Մեր առօրյան
Մանկապարտեզը առաջնորդվում է հաստատված ծրագրով՝
- խոսքի և տրամաբանական գիտելիքների զարգացում
- օտար լեզուների դասավանդում (անգլերեն, ֆրանսերեն, ռուսերեն)
- պար
- երգ – երաժշտություն
- ստեղծագործական ունակությունների զարգացում
- մանկաբույժի ծառայություն
Մանկապարտեզում գործում է նաև հոգեբանի ( ԱՐՏ – թերապիա, ավազաթերապիա, ձեռքերի մատորիկա) և լոգոպեդի ծառայություն:
Այստեղ ձեր երեխան շրջապատված կլինի ջերմությամբ ու հոգատարությամբ, կստանա իր տարիքին համապատասխան կրթություև, դաստիարակություն, կզբոսնի և կխաղա մեր մանկապարտեզի խնամված այգում, կսնվի 3 անգամ բարձրորակ սննդով և կլինի մանկավարժների ուշադրության կենտրոնում:
Մանկապարտեզ ընդունվելու համար պարտադիր պայման է լինել Մալաթիա- Սեբաստիա համայնքի բնակիչ:
Ընդունելության համար անհրաժեշտ է ներկայացնել.
- ծննդյան վկայականի բնօրինակը եւ պատճենը
- Տեղեկանք հաշվառման վայրից
- Դիմում
- Տեղեկանք բնակության վայրից /վարձակալությամբ ապրողների դիմումները չեն ընդունվում/
Դիմումները ընդունվում են ս/թ մայիսի 20-ից մինչեւ հունիսի 10-ը, ամեն օր ժամը 14.00-ից մինչև 17.00, բացի շաբաթ եւ կիրակի օրերից:
Մյս 11, 2016 | Մեր առօրյան
Մայիսի 7-ին և 8-ին տեղի ունեցան բանավեճի հանրապետական մրցաշարի 1/8-րդ եզրափակիչ և կիսաեզրափակիչ փուլերը: Մրցաշարին մասնակցում էին Հայաստանի տարբեր մարզերի 26 հավաքական թիմեր, որոնցից եզրափակիչ փուլ դուրս եկան «Էջմիածին» և «Երևան 1» թիմերը:
Նշենք, որ «Երևան 1» թիմին առաջնորդում էր Ավետիսյան դպրոցի բանավեճի ակումբի ղեկավար Արևիկ Խաչատրյանը, իսկ թիմի կազմում մեր աշակերտներից հանդես էր գալիս Լուսինե Եղիազարյանը:
Եզրափակիչ բանավեճը տեղի ունեցավ մայիս 9-ին: Թիմերը բանավիճում էին «Ներկայիս ահաբեկչությունները գերտերությունների վարած քաղաքականության արդյունք են» թեմայով:
Ուրախությամբ տեղեկացնում ենք, որ «Երևան 1» թիմը հաղթել է մրցաշարում և դարձել ոսկե մեդալակիր:
Շնորհավորում ենք մեր բանավեճի ակումբի բոլոր անդամներին, նրա ղեկավարին և բոլորիս ցանկանում նորանոր հաղթանակներ:
Մյս 2, 2016 | Մեր առօրյան
Արդեն երկրորդ տարին է՝ Ավետիսյան դպրոցի աշակերտները մասնակցում են Համաշխարհային փոստային միության կողմից կազմակերպվող շարադրությունների մրցույթին: Հիշեցնենք, որ նախորդ տարի մեր աշակերտուհու շարադրությունն արժանացել էր միջազգային ժյուրիի հատուկ հավաստագրի:
Այս տարի նշվում է մրցույթի 45-րդ տարեդարձը, և այդ կապակցությամբ Համաշխարհային փոստային միությունը ընտրել էր «Գրի′ր նամակ քեզ 45 տարեկան հասակում» խորագիրը: Ուրախությամբ տեղեկացնում ենք, որ այս տարի «Հայփոստ» ընկերությունը մրցույթին մասնակցող շարադրություններից ընտրել և Համաշխարհային փոստային միություն է ուղարկել Ավետիսյան դպրոցի 9-րդ դասարանի աշակերտ Զավեն Անտոնյանի աշխատանքը:
Հուսանք՝ Զավենի շարադրությունը միջազգային մրցույթում ևս հաջողություն կունենա:
Ապր 28, 2016 | Մեր առօրյան
Արդեն վեցերորդ տարին է, ինչ, որպես ապրիլի 24-ի բնականոն շարունակություն, Ծիծեռնակաբերդի հուշահամալիրում Վայրի բնության և մշակութային արժեքների պահպանման հիմնադրամի նախաձեռնությամբ իրականացվում է «Ծաղկահավաք» միջոցառումը :
Այս նախաձեռնությունը մեկտեղում է ապրիլի 24-ին Հայոց ցեղասպանության զոհերի հուշահամալիրում անմար կրակի շուրջը խոնարհված բյուրավոր ծաղիկների «երկրորդ կյանք» հաղորդելու խորհուրդը և բնապահպանական՝ վերամշակման միջոցով դրանք կրկին օգտագործելու առաքելությունը: Ցողունն անջատվում է ծաղկաթերթերից և վերածվում պարարտախառնուրդի՝ օգտագործվելով հուշահամալիրի Հիշողության պուրակում հողի մշակման համար, իսկ խնամքով անջատված ծաղկաթերթերն օգտագործվում են ձեռակերտ վերամշակված թուղթ ստանալու համար, որից պատրաստվում են հուշագրեր, շնորհակալագրեր, բացիկներ և այլն:
Բնականաբար, հենց սկզբից այս մեծախորհուրդ նախաձեռնությանն առաջինը արձագանքողների մեջ էին «Հայ կրթություն» կրթական հիմնադրամի կրթահամալիրի/ «Հայ կրթություն» հիմնադրամի «Խորեն և Շուշանիկ Ավետիսյաններ» կրթահամալիրի/ էկոակումբի անդամները: Նրանք ամեն տարի՝ ապրիլի 27-ին, բարձրանում են Ծիծեռնակաբերդ՝ մասնակցելու ծաղիկների տեսակավորման, մշակման և տարածքի մաքրման աշխատանքներին: Այդ առումով բացառություն չէր նաև 2016-ի ծաղկահավաքը: Այսօր՝ ապրիլի 27-ին, «Հայ կրթության» էկոակումբի անդամները՝ 6-11-րդ դասարանների 16 աշակերտ, երկժամյա հերթափոխով ժրաջանորեն աշխատեցին հանրապետության այլ դպրոցների աշակերտների, ուսանողների, զինվորականների, սփյուռքահայերի, օտարազգի հյուրերի, դիվանագիտական մարմինների, պետական, հասարակական և միջազգային հաստատությունների ներկայացուցիչների և այլ կամավորների կողքին:
Լուսանկարները՝ Անդրանիկ Մարդոյանի
Ապր 22, 2016 | Մեր առօրյան
2016 թվականի մարտ ամսին «Խորեն և Շուշանիկ Ավետիսյան» դպրոցի տնօրեն Մ. Գեղամյանի հրավերով ԳԹԿ-ն 11-րդ դասարանում իրականացրեց արտաքին ընթացիկ գնահատում «Հայոց լեզու» և «Մաթեմատիկա» առարկաներից:
Գրավոր աշխատանքը տրվել էր թեստի ձևով, ընդ որում, ինչպես նախապես նշել էր ԳԹԿ-ի Քննական առաջադրանքների և մեթոդական օժանդակության բաժնի գլխավոր մասնագետ (հայոց լեզու և գրականություն) Միրցա Հալաջյանը, թեստն իր կառուցվածքով և հարցադրումներով աննախադեպ էր և առաջին անգամ կազմված է եղել հատուկ այս դասարանի համար:
Թեստն ընդգրկել է 10 հարց իր ենթահարցերով, իսկ լուծման համար տրվել է 45 րոպե:
Ապրիլի14-ին տեղի ունեցած ընթացիկ գնահատման արդյունքների ամփոփման ժամանակ Միրցա Հալաջյանը նշեց, որ «Հայոց լեզու» առարկայից դասարանը արձանագրել է բավական լավ արդյունք (50% առաջադիմության որակ): Մասնավորապես շեշտեց այն, որ թեստի վերլուծությունից պարզ է դարձել, որ եթե աշակերտը գիտի թեման, ապա գիտի հիմնավոր, այսինքն իմացած գիտելիքը կարողանում է կիրառել, համադրել, եզրակացություններ անել: Սա նշանակում է, որ աշակերտների մեծ մասը ոչ թե պարզապես անգիր է անում, այլ կուտակում է հիմնարար գիտելիք:
Թեստի կառուցվածքի յուրահատկությունն այն էր, որ այն բաղկացած էր պնդումներ պարունակող 10 առաջադրանքներից, որոնց կատարման համար աշակերտը նախ ճիշտ կամ սխալ պնդման ընտրություն պիտի կատարեր,պատասխաներ հարցին,ապա հիմնավորեր իր տված պատասխանը: Այս թեստի նպատակը, ըստ թեստաբանի, աշակերտի գիտելիքի ստուգումն է 3 տարբեր մակարդակներով, ինչպես նաև պատահական նշումներով դրական գնահատական ստանալու բացառումն էր:
