Փտր 19, 2016 | Մեր առօրյան
Հանճարեղ լոռեցու` Հովհաննես Թումանյանի ծննդյան օրը` փետրվարի 19-ը, վերջին տարիներին Հայաստանում նշվում է որպես Գիրք նվիրելու օր:
«Ավետիսյան» դպրոցի ընթերցասեր աշակերտներն ըստ պատշաճի պատրաստվել էին այս օրվան: Նախ տարրական դպրոցի սաներն իրենց ավագ ընկերներին բեմից պատմեցին, թե ինչպես է ստեղծվել գիրքը, որոնք են Հայաստանի և աշխարհի ամենամեծ գրադարանները, և մի շարք այլ հետաքրքրիր փաստեր գրքի մասին:
Միջին և ավագ դպրոցների աշակերտներն էլ, իրենց ուսուցիչների օգնությամբ նախապես ուսումնասիրելով գրադարանում առկա գրքերը, կազմել էին անհրաժեշտ գրականության ցանկ`որոշելով համատեղ ուժերով ձեռք բերել դրանք և նվիրել գրադարանին:
Դպրոցին գրքեր նվիրեցին նաև տնօրեն Մելանյա Գեղամյանը և ՖԿՀՊԻ մարզաառողջարարական ֆակուլտետի դեկան Անահիտ Հարությունյանը:
Սիրելի´ աշակերտներ, շտապե´ք ընթերցելու այս նոր գրքերը, որոնք կօգնեն ձեզ բացահայտելու նորանոր ու զարմանահրաշ աշխարհներ:
Փտր 5, 2016 | Մեր առօրյան
Օրերս «Ավետիսյան» դպրոցի աշխորհրդի անդամներն այցելել են զոհված զինծառայող Աղասի Գրիգորյանի ընտանիքին:
Աղասին Արարատի մարզի Արբաթ գյուղից էր: Սովորում էր «Հայբուսակ» համալսարանի բժշկական ֆակուլտետում, ապագա ատամնաբույժ էր: Նա, կիսատ թողնելով ուսումը, մեկնում է ծառայության:
2015 թ. դեկտեմբերի 18-ի գիշերը ադրբեջանական բանակի հատուկ նշանակության խմբերն իրականացնում են հերթական դիվերսիոն փորձը: Հայ դիրքապահներին հաջողվում է հետ մղել թշնամուն, սակայն մերձամարտերի ժամանակ արիաբար զոհվում են Աղասի Արսենի Գրիգորյանը և Ռուբեն Ռոբերտի Ալեքսանյանը:
Այս երկու հերոսները հունվարի 28-ին ՀՀ նախագահի հրամանով հետմահու պարգևատրվել են Արիության մեդալով:
Մեր աշակերտները այցելեցին Աղասի Գրիգորյանի ընտանիքին և իրենց զորակցությունը հայտնեցին այս հերոսի ծնողներին՝ նշելով, որ նրանց որդին իրենց համար անմնացորդ հայրենասիրության և քաջության օրինակ է:
Դկտ 28, 2015 | Մեր առօրյան
«Ավետիսյան» դպրոցի աշակերտները սիրում են ոչ միայն լավ սովորել, այլև մի լավ ուրախանալ, իսկ հարմար առիթի դեպքում էլ` բեմ բարձրանալ ու խաղալ ներկայացումներում:
Կիսամյակի վերջին շաբաթվա ընթացքում նրանք հասցրին և´ հանձնել իրենց քննություններն ու ստուգարքները, և´ մասնակցել դպրոցում անցկացվող տոնական միջոցառումներին:
Դեկտեմբերի 24-ին մեր թատերական խմբակի ներկայացումն էր: Բեմադրվել էին անմահ Թումանյանի միշտ արդիական հեքիաթները (բեմադրիչ` Հակոբ Միքայելյան):
Դեկտեմբերի 26-ին էլ թատերական մյուս խմբակի բեմադրությունն էր`«Հրաշք գիշեր» խորագրով (բեմադրիչ` Նունե Աբրահամյան):
Էլ ի՜նչ ամանորյա հրաշք առանց Ձմեռ պապի ու նրա նվերների: Ներկայացման ավարտին դպրոց այցելեց Ամանորի ամենասպասված հյուրը, մեզ մի լավ ուրախացրեց և դպրոցի տնօրենության անունից մեր բոլոր աշակերտներին նվիրեց գեղեցիկ գլխարկներ, իսկ վերջում կարդաց մեր սիրելի տնօրեն տիկին Գեղամյանի ամանորյա ուղերձը:
Դկտ 22, 2015 | Մեր առօրյան
Դեկտեմբերի 22-ին «Ավետիսյան» դպրոցում տոնական եռուզեռ էր. ժամը 12-ին սկսվելու էր ամանորյա բարեգործական տոնավաճառը: Աշակերտները այս միջոցառմանը պատրաստվել էին մեծ ոգևորությամբ. նրանց ընձեռվել էր բարի գործ կատարելու հերթական հնարավորությունը …
Մեր տաղանդավոր սաները նախօրոք պատրաստել էին տարատեսակ անուշեղեններ, տոնածառի խաղալիքներ, ձեռագործ աշխատանքներ ու գեղեցիկ հուշանվերներ, որոնք պետք է վաճառեին:
Տոնավաճառի ընթացքում մեր փոքրիկ հրուշակագործներն ու արհեստավորները վերածվեցին հմուտ առևտրականների, որոնք սակարկում էին, «հաճախորդների» ուշադրությունը գրավելու տարբեր հնարամիտ միջոցներ մտածում և համոզում գնումներ կատարել:
Օրը աշակերտների և ուսուցիչների համար ի վերջո վերածվեց տոնի, որին մասնակցեցին նաև աշակերտների ծնողները, ինչպես նաև դպրոցի` տարբեր տարիների շրջանավարտներ:
Բարեգործական տոնավաճառի հասույթը կտրվի որևէ կարիքավոր ընտանիքի:
Դկտ 18, 2015 | Մեր առօրյան
Ազգային հանրակրթական դպրոցում ռուսաց և գրականության դասավանդման մեթոդիկայի արդի ուղղությունները» խորագրի ներքո լույս է տեսել ռուսաց լեզվի և գրականության ուսուցիչների II, III, IV միջազգային գիտագործնական համաժողովների նյութերի ժողովածուն: Ի թիվս այլ հրապարակումների` նրանում տեղ են գտել նաև «Հայ կրթություն» կրթական հիմնադրամի ռուսաց լեզվի և գրականության ուսուցիչներ Սվետլանա Աղաջանյանի «Նախադասության վրա կատարվող աշխատանքները» և Նաիրա Հովհաննիսյանի «Ռուսերեն դարձվածների ուսուցման մի քանի հարցեր» հոդվածները:
Դկտ 17, 2015 | Մեր առօրյան
Հերթական բարեգործական միջոցառումը «Ավետիսյան» դպրոց-համայնքային կենտրոնում
Խորեն և Շուշանիկ Ավետիսյանների անվան դպրոց-համայնքային կենտրոնում բարեգործական միջոցառումները դարձել են բարի ավանդույթ: Դպրոցի ուշադրության կենտրոնում են հատկապես Մալաթիա-Սեբաստիա համայնքի հղի մանկավարժները, որոնք էլ ժամանակ առ ժամանակ հրավիրվում են «Ավետիսյան» դպրոցի կողմից կազմակերպվող տարբեր միջոցառումների և հեռանում իրենց փոքրիկների համար նախատեսված տարատեսակ նվերներով:
Ապագա մայրիկների հետ հերթական հանդիպումը կազմակերպվել էր Ամանորի նախաշեմին: Դեկտեմբերի 16-ին Մալաթիա-Սեբաստիա համայնքի 22 հղի մանկավարժներ, ինչպես նաև կրթության բաժնի աշխատակիցներ էին հրավիրվել «Ավետիսյան» դպրոց: Հանդիպման ընթացքում ցուցադրվեց գեղեցիկ ֆիլմ` նվիրված նորածինների ճիշտ խնամքին:
Դպրոցի տնօրենությունը Ամերիկայի հայ ավետարանչական ընկերակցության հովանավորությամբ ապագա մայրիկներին նվիրեց նորածինների համար նախատեսված գլխարկներ և ծածկոցներ:
Նվերները պատահական չէին ընտրված: Հայ նորածիններին գլխարկներ և ծածկոցներ նվիրելու նախաձեռնությունը սկսվել է 2013 թ., երբ ԱՄՆ-ի Նյու Ջերսի նահանգի բնակիչ Բեթի Չերքեզյանը նախաձեռնեց «Գործված է սիրով» ծրագիրը, որի նպատակը հայ նորածիններին անհրաժեշտ պարագաներով ապահովելն էր: Նշենք, որ ծրագիրը Հայաստանում կյանքի է կոչվում Ամերիկայի հայ ավետարանչական ընկերակցության ջանքերով:
