Մեր դպրոցը շարունակում է սերտորեն համագործակցել կրթության փորձագետ, ճանաչված դասախոս Սերոբ Խաչատրյանի հետ:
Դեկտեմբերի 15-ին մասնագետը դպրոցում հանդես եկավ հերթական դասախոսությամբ, որի ընթացքում ներկայացրեց ուսուցման արդյունավետությունը բարձրացնող մի շարք մեթոդներ:
Դեկտեմբերի 8-ին «Ավետիսյան» դպրոցում տեղի է ունեցել ԵՊՀ փիլիսոփայության պատմության և ԵՊԼՀ կրթության կառավարման և պլանավորման ամբիոնների դասախոս, կրթության փորձագետ Սերոբ Խաչատրյանի «Կամուրջներ պատերի փոխարեն» գրքի շնորհանդեսը:
Հանրապետությունում ճանաչված մասնագետը խոսեց ժամանակակից դպրոցում առկա խնդիրների ու բացթողումների մասին, ներկայացրեց գործնական մի քանի քայլեր, որոնք կնպաստեն ուսուցչին և աշակերտին ավելի մոտեցնող, նրանց միավորող կամուրջների կառուցմանը:
Շնորհանդեսին ներկա էին ինչպես մեր, այնպես էլ Մալաթիա-Սեբաստիա համայնքի տարբեր դպրոցների ուսուցիչներ, որոնք էլ մասնակցեցին գրքի շնորհանդեսին հաջորդող քննարկմանը:
«Ավետիսյան» դպրոցի բնապահպանական ակումբն արդեն ունի իր ֆեյսբուքյան էջը: Այսուհետ «OIKOS» բնապահպանական ակումբի նորություններին կարող եք հետևել նաև այս էջով՝ fb.com/OIKOSClub
Մեր կանաչ դպրոցի էկոակումբի աշակերտներն իրենց հերթական պարապմունքի ժամանակ պատրաստել են կոմպոստ: Մի փոքր` կոմպոստի մասին. այն բուսական, հանքային ու կենդանական նյութերի թափոններից հողի կամ տորֆի խառնուրդով պատրաստվող օրգանական պարարտանյութ է, որ պարունակում է բույսերին անհրաժեշտ բոլոր սննդատարրերը՝ ազոտ, ֆոսֆոր, կալիում, ինչպես նաև բազմաթիվ բակտերիաներ, խմորիչներ, սնկեր և հողային այլ մարմիններ:
Կոմպոստի պատրաստման համար անհրաժեշտ են ինչպես թարմ, այնպես էլ չորացած խոտեր ու տերևներ, փայտի տաշեղներ, բուսական սննդի մնացորդներ և նմանատիպ այլ նյութեր: Համոզվելու համար, որ խառնուրդը բավականաչափ խոնավ է, հարկավոր է այն պարբերաբար թրջել ու խառնել, որպեսզի բաղադրիչներից գոյացած կույտի մեջ թթվածին ներթափանցի:
Պատրաստված կոմպոստը կօգտագործվի դպրոցի կանաչապատ տանիքում բույսեր աճեցնելիս:
«Ավետիսյան» դպրոցի էկոակումբը շարունակում է մասնակցել բնապահպանական տարբեր նախաձեռնությունների: Օրերս ակումբի անդամները մասնակցել են «ԷյԹիՓի» ընկերության կազմակերպած ծառատունկին: Ծառատունկի մասնակիցները Կոտայքի մարզի Ակունք գյուղում ՝ Սուրբ Պողոս-Պետրոս եկեղեցու շրջակայքում, տնկեցին 700 ծառ:
Ուրախությամբ տեղեկացնում ենք` այսօր մեր աշակերտները ՀՀ դպրոցականների
շախմատի 10-րդ օլիմպիադայի 2-րդ փուլի մրցաշարում գրավել են երկրորդ տեղը:
Դպրոցը մրցաշարում ներկայացնում էին Սադո Նիկոլայը, Հովհաննիսյան Վարդանը, Հովսեփյան Մերին ու Ստեփանյան Համայակը: Շնորհավորում ենք մեր շախմատիստներին և շախմատի ուսուցիչ Ե. Մազմանյանին` մաղթելով նորանոր հաջողություններ:
