Հկտ 5, 2015 | Մեր առօրյան
Խորեն և Շուշանիկ Ավետիսյանների անվան դպրոցի և համայնքային կենտրոնի տնօրենությունը Ուսուցչի միջազգային օրը հիշարժան դարձրեց Մալաթիա-Սեբաստիա համայնքի հղի ուսուցիչների համար: Նրանք հրավիրվել էին մեր դպրոց՝ մասնակցելու տոնական միջոցառմանը, և Ամերիկայի Հայ Ավետարանչական ընկերակցության կողմից ստացան զանազան նվերներ: Դպրոցի տնօրեն տիկին Գեղամյանը ապագա մայրերին մաղթեց քաջառողջություն՝ խոստանալով, որ «Ավետիսյան» դպրոցի և մանկապարտեզի դռներն ապագայում միշտ բաց կլինեն լույս աշխարհ գալ պատրաստվող այս փոքրիկների առջև:
Սպտ 30, 2015 | Մեր առօրյան
«Ավետիսյան» կրթահամալիրը՝ Հայաստանի առաջին կանաչ դպրոցը, կարևորելով աշակերտների բնապահպանական դաստիարակությունը, շարունակում է մասնակցել հասարակական տարբեր նախաձեռնությունների, որոնց նպատակը շրջակա միջավայրի պահպանումն է:
Այս անգամ մեր դպրոցը մասնակցեց սեպտեմբերի 26-ին «ԷյԹիՓի» բնապահպանական կազմակերպության նախաձեռնած աղբհավաքին («ԷյԹիՓի»-ի հետ համագործակցությունը սկսվել է 2014 թվականին), որը իրականացվում էր Ապարանի Միրաք գյուղի շրջակայքում գտնվող սոսիների պուրակում: Մեր դպրոցի աշակերտները աշխարհագրության ուսուցիչ Ք. Գևորգյանի և քիմիայի ուսուցիչ Ծ. Մանուկյանի հետ սիրով օգնեցին պուրակի մաքրման աշխատանքներին:
Նման նախաձեռնություններն աշակերտներին ևս մեկ անգամ հիշեցնում են շրջակա միջավայրի պահպանության կենսականությունն ու նրանց մեջ ձևավորում պատասխանատվություն բնության նկատմամբ:
Սպտ 24, 2015 | Մեր առօրյան
Սեպտեմբերի 21-ին՝ Անկախության օրը, դպրոցի երկրապահ կամավորական միության անդամ աշակերտները դպրոցի զինղեկ Եփրեմ Մազմանյանի ուղեկցությամբ այցելեցին Եռաբլուր՝ հարգանքի տուրք մատուցելու անկախության համար զոհված ազատամարտիկների հիշատակին: Աշակերտները մոմեր վառեցին և ծաղկեփնջեր դրեցին ազատամարտիկների գերեզմանաքարերին ՝ արտահայտելով իրենց խոր երախտագիտությունը:
Սպտ 4, 2015 | Մեր առօրյան
Սեպտեմբերի 4-ին Հայաստանի Հանրապետությունում նշվում է Արտակարգ իրավիճակների նախարարության աշխատակցի օրը: Խորեն և Շուշանիկ Ավետիսյանների անվան դպրոցի «Նախնական զինվորական պատրաստվածություն» առարկայի ուսուցիչ Եփրեմ Մազմանյանի նախաձեռնութամբ կազմակերպվել էր միջոցառում՝ «Վարվելակերպի կանոնները երկրաշարժի ժամանակ» թեմայով: Այն ուսուցողական էր, նրա նպատակն էր աշակերտներին իրազեկել երկրաշարժերի մշտական վտանգի, բնական աղետների ժամանակ անհրաժեշտ գործողությունների և մարդկանց վարքի մասին:
Միջոցառմանը ներկա էին մանկապարտեզի, տարրական, միջին և ավագ դպրոցի բոլոր սաներն ու ուսուցիչները:
Ուսուցողական նմանատիպ միջոցառումները կարևոր են ու անհրաժեշտ. բնական աղետների ժամանակ հաճախ մարդկանց գործողություններից ու վարքից են կախված նրանց կյանքն ու առողջությունը:
Ամփոփիչ խոսքով հանդես եկավ ՄԱԿ-ի մանկական հիմնադրամի աղետների ռիսկի նվազեցման ծրագրի ղեկավար, ՀԽ անդամ` Տիգրան Թովմասյանը:
Սպտ 1, 2015 | Մեր առօրյան
Այսօր սեպտեմբերի 1-ն է, աշնան առաջին օրը, որը վաղուց ի վեր նշվում է որպես գիտելիքի օր: Ավետիսյան դպրոց և համայնքային կենտրոնում 2015-2016 ուստարվա սեպտեմբերմեկյան միջոցառումը սկսվում էր դեռևս բակից: Այնտեղ հնչում էին մանկական ուրախ երգեր, և տիրում էր բարձր տրամադրություն:
Ողջույնի խոսքով հանդես եկավ կրթահամալիրի կորդինացիոն խորհրդի նախագահ պ-ն Հարութ Ներսիսյանը: Նա շնորհավորեց նոր ուսումնական տարվա առթիվ և շնորհակալություն հայտնեց ծնողական համայնքին դպրոցին աջակցելու համար: Պ-ն Ներսիսյանը մեկ անգամ ևս շնորհակալություն հայտնեց Ավետիսյան բարերար ընտանիքին հանրությանը նման դպրոց նվիրելու համար:
Տնօրեն Մ. Գեղամյանը շնորհավորեց աշակերտներին և ուսուցիչներին նոր ուսումնական տարվա կապակցությամբ: Նա ընթերցեց ՀՀԿԳՆ Ա. Աշոտյանի՝ գիտելիքի և դպրության օրվան նվիրված ուղերձը: Դպրոցական զանգի ղողանջի ներքո 9-11-րդ դասարանների աշակերտները դպրոց ուղեկցեցին 60 առաջին դասարանցիների, որոնք սրտի թրթիռով էին սպասում այդ օրվան: Միջոցառումը շարունակվեց նաև դպրոցի շքեղ դահլիճում, որտեղ ողջույնի խոսքով ելույթ ունեցան 1-11-րդ դասարանների աշակերտներ:
