Մյս 2, 2017 | Մեր առօրյան
Ավետիսյան տարրական և միջին դպրոցի բոլոր դասղեկները վերջին ամիսների ընթացքում մասնակցել են «Ջինիշյան» հիշատակի հիմնադրամի կողմից անցկացվող վերապատրաստման դասընթացին, որի խորագիրն է` «Խաղացե´ք ազնիվ»: Ծրագրի շնորհիվ մեր ուսուցիչները թարմացրին 6-12 տարեկան երեխաների տարիքային առանձնահատկությունների վերաբերյալ ունեցած գիտելիքները, ինչպես նաև գործնական պարապմունքների ընթացում սովորեցին դերային խաղերի միջոցով աշակերտների դրական վարքագիծը զարգացնող և ամրապնդող նոր մեթոդներ: Ծրագրի նպատակն է աշակերտներին սովորեցնել ՀԱՄԱԳՈՐԾԱԿՑՈՒԹՅՈՒՆ, ԱՐԴԱՐՈՒԹՅՈՒՆ, ՆԵՐԱՌՈՒՄ, ՀԱՐԳԱՆՔ, ՊԱՏԱՍԽԱՆԱՏՎՈՒԹՅՈՒՆ, ԸՆԴՈՒՆՈՒՄ արժեքների կարևորությունը:
Վերապատրաստված ուսուցիչները շաբաթական առնվազն մեկ անգամ աշակերտների հետ դպրոցում անցկացնում են դերային խաղեր, որոնց էլ երեխաները մասնակցում են մեծ խանդավառությամբ` ձեռք բերած հմտությունները կիրառելով թե´ դպրոցում և թե´ իրենց առօրյայում:
Ապր 30, 2017 | Մեր առօրյան
Ավետիսյան դպրոցում տեղի ունեցավ Մեծ եղեռնի անմեղ զոհերի հիշատակին նվիրված միջոցառում՝ «Կոմիտասը հայ ժողոովուրդն է» խորագրով։
Կրթահամալիրի շնորհալի սաները սրտաշարժ և տպավորիչ ելույթով ներկայացրին հայ երաժշտության ռահվիրա Կոմիտաս վարդապետի կյանքի ուղին, ինչպես նաև մարմնավորեցին հայ ազգի նշանավոր բանաստեղծներ Դանիել Վարուժանին, Ռուբեն Սևակին, Սիամանթոյին և հայատյաց թուրք փաշաներին։
Կերպարանավորելով եղեռնազոհ մեծանուն մտավորականներին՝ նրանք ոգեկոչում էին թուրքական յաթաղանին զոհ գնացած մեկուկես միլիոն անմեղ հայերին։
Միջոցառումն ավարտվեց Պարույր Սևակի՝ Կոմիտասին նվիրված «Անլռելի զանգակատուն» պոեմի սրտառուչ և ոգեշունչ տողերով։
Ապր 27, 2017 | Մեր առօրյան
Iա դասարանը իր Այբբենարանի ավարտը նշեց ուրախ հանդեսով, որը կրում էր «Կորած գիրը» խորագիրը:
Կորել էր Այբբենարանը: Երեխաները, որոնք դարձել էին հեքիաթների հերոսներ, փնտրեցին և գտան այն: Ուրախ էին, որ վերջապես գրել-կարդալ էին սովորելու:
Ապր 26, 2017 | Մեր առօրյան
«Հույս, հավատ, սեր» խորագրով, Այբբենարանի ավարտին նվիրված, միջոցառումը: Աշակերտները «Հայ կրթություն» նավով ուղևորվեցին դեպի հույսի, հավատի, սիրո ապագա՝ իրենց հետ տանելով ամենաթանկ արժեքները՝ ՀԱՅՐԵՆԻՔ, ՀԱՅՈՑ ԼԵԶՈՒ, ԸՆՏԱՆԻՔ, ԸՆԿԵՐՆԵՐ:
Ապր 21, 2017 | Մեր առօրյան
Երեկ Ավետիսյան դպրոցում 8 ա դասարանի մասնակցությամբ անցկացվեց Սուրբ Զատիկին նվիրված գեղեցիկ միջոցառում:
Նախ ներկաներն իրենց աղոթն ուղղեցին առ Աստված, որից հետո դպրոցի սաները ներկայացրին Ս. Հարության տոնի խորհուրդն ու նշանակությունը քրիստոնյաների կյանքում: Նրանք փաստեցին, որ Հիսուս Քրիստոսի հրաշափառ հարության տոնը Հայ առաքելական եկեղեցու հինգ տաղավար տոներից ամենագունեղն ու ամենատարածվածն է:
Բեմականացումը դահլիճում առաջացրեց զատկական հաճելի իրարանցում: Խորհրդավոր ընթրիքի տեսարան, ավանդական զատկական արարողություն, սովորույթներ, ծեսեր, ազգային երգ ու պար: Աշակերտների ստացած դասն էր`չհեռանալ ազգային մշակույթից և ապրել քրիստոնյային վայել կեցվածքով:
Ցերեկույթի ավարտին կրթահամալիրի տնօրեն Մ. Գեղամյանը ներկաներին հորդորեց մշտապես հոգիներում վառ պահել Հիսուսի հրաշափառ հարության լույսը և լինել բարձր արժեհամակարգով օժտված քաղաքացիներ:
Ապր 18, 2017 | Մեր առօրյան
ԱՄՆ Խաղաղության կորպուսի կողմից կազմակերպվող ասմունքի ամենամյա մրցույթին մասնակցելը Ավետիսյան կրթօջախում դարձել է բարի ավանդույթ, ինչո՞ւ չէ, նաև պատվի հարց։
Այս տարվա ասմունքի մրցույթն անցկացվում էր «Պատերազմի ապարդյունություն» խորագրի ներքո։ Եվ քանի որ անցյալ տարի մեր երկրի շատ քաջորդիներ նահատակվեցին ապրիլյան քառօրյա պատերազմում, Ավետիսյան դպրոցը սրտին մոտ ընդունեց պատերազմի ապարդյունությունը բոլորին տարածելու այս մարտահրավերը։
Մրցույթի մարզային փուլին, որն անցկացվեց ապրիլի 15-ին Արտաշատ քաղաքի N 2 դպրոցում, մասնակցեցին Ավետիսյան դպրոցի երեք սաներ։ Մրցակցությունն ընթանում էր առանձին տարիքային խմբերում։ Եվ մենք հպարտ ենք հայտարարելու, որ մեր թիմը Արտաշատից վերադարձավ հաղթանակով։ Այդ են վկայում ավետիսյանցիների արդյունքները: Ահա´դրանք.
Գայանե Հովնանյան (8-րդ դասարան). 1-ին տեղ,
Մարիետա Ղազարյան (10-րդ դասարան). 2-րդ տեղ,
Լիանա Հաբեշյան (12-րդ դասարան). 1-ին տեղ։
Առաջին տեղ զբաղեցրած աշակերտները կմրցեն ասմունքի հանրապետական փուլին, որը կանցկացվի մայիսի 7-ին Հայաստանի ամերիկյան համալսարանում։
