Օգս 23, 2015 | Մեր առօրյան
Խորեն և Շուշանիկ Ավետիսյանների անվան դպրոցում գիտելիքի տոն է յուրաքանչյուր օր: Նոյեմբերի 27-ը ևս բացառություն չէր: Այս անգամ դպրոցում անցկացվում էր «Դասարանապատկեր» մրցույթը կրթահամալիրի հինգերորդ դասարանների աշակերտների միջև: Աշակերտները խանդավառությամբ էին պատասխանում հայերենի բառագիտությանը և հնչյունաբանությանը նվիրված հետաքրքրաշարժ հարցերին, խրախուսում և ոգևորում միմյանց:
Տնօրեն Մ. Գեղամյանը ևս խրախուսեց մասնակիցներին՝ գովեստի խոսքեր ասելով աշակերտների և միջոցառման կազմակերպիչ Լ. Բախշյանի հասցեին: Նա մասնակիցներին նվիրեց Սուրեն Մուրադյանի «Իմ վերջին կանգառը» ժողովածուն՝ հորդորելով նրանց սիրել գիրքն ու գրականությունը:
Հաղթեց համերաշխությունը, իսկ ավելի և ամենից շատ՝ մայրենի լեզուն:
Օգս 23, 2015 | Մեր առօրյան
02.12.14թ-ին «Հայ կրթություն» կրթական հիմնադրամում տեղի է ունեցել Մ. Յու. Լերմոնտովի 200 ամյակին նվիրված միջոցառում: Միջոցառմանը ներկա էր բազում ռուսերեն դասագրքերի հեղինակ, ակադեմիկոս, տիկինԲելլա Մարկի Եսաջանյանը:
Միջոցառման ընթացքում հիմնադրամի աշակերտները դինամիկ և գունեղ ներկայացրեցին Լերմոնտովի կյանքը, գործունեությունը և ստեղծագործությունները, որի ընթացքում էկրանին ցուցադրվում էին համապատասխան նկարներ: Ճիշտ ռուսական առոգանությամբ երեխաները ասմունքեցին Լերմոնտովի բանաստեղծությունները,երգեցին նրա խոսքերի հիման վրա գրված երգեր ու հանդիսատեսին հիացրեցին իրենց պարերով («Մասկարադ» վալս Ա. Խաչատրյան և Վրացական պար):
Օգս 23, 2015 | Մեր առօրյան
Դեկտեմբերի 5-ին Խորեն և Շուշանիկ Ավետիսյանների անվան դպրոց-համայնքային կենտրոնում տեղի ունեցավ սեմինար անգլերենի դասաժամերին տեղեկատվական տեխնոլոգիաների արդյունավետ կիրառության ձևերի վերաբերյալ: Սեմինարավարն էր Հայաստանի ամերիկյան համալսարանի դասախոս Իռշատ Մադյարովը: Սեմինարին մասնակցում էին Մալաթիա-Սեբաստիա համայնքի տարբեր դպրոցների անգլերենի ուսուցիչներ: Սեմինարի ընթացքում քննարկվեց առցանց պլատֆորմների, բլոգների, ձայնագրությունների, տեսադիտողական և տեսալսողական նյութերի կիրառումը դպրոցում:
Սեմինարի ընթացքում ձեռք բերված գիտելիքները օգտակար կլինեն ուսուցիչների և՛ դասարանային, և՛ արտադասարանային գործունեության ընթացքում:
Օգս 23, 2015 | Մեր առօրյան
Դեկտեմբերի 9-ին «Հայ կրթություն» կրթական հիմնադրամի կրթահամալիրի Խորեն և Շուշանիկ Ավետիսյանների անվան դպրոցի 6-րդ «ա» և «բ» դասարանների միջև (դասավանդող ուսուցիչներ` Ն. Մելիքյան և Կ. Կյուրեղյան) անցկացվեց «Գիտելիքն աշխարհ է կառուցում» խորագրով խաղ-մրցույթ, որը կազմակերպել էր մաթեմատիկայի և ինֆորմատիկայի մեթոդմիավորման նախագահ Ն. Մելիքյանը դպրոցի 9-րդ դասարանի աշակերտների գործուն օժանդակությամբ:
Խաղի սահմանված կանոնների խստիվ պահպանմամբ թիմերը քայլ առ քայլ կառուցեցին իրենց «մաթեմատիկական աշխարհը»՝ հուզմունքի, ոգևորության ու նաև լարվածության պահեր պարգևելով թե՛ մրցակիցներին, թե՛ նրանց երկրպագուներին՝ բարձրդասարանցիներին և հյուրերին:
Արդյունքում շահեցին բոլորը. վեցերորդցիներն ամփոփեցին ուստարվա առաջին կիսամյակում ստացած գիտելիքները, 9-րդցիներն առաջիկա ավարտական քննության նախաշեմին կրկնեցին վեցերորդ դասարանի դասընթացը իսկ երկրպագուները մեծ բավականություն ստացան այս աշխույժ, հետաքրքրաշարժ և ուսանելի մրցախաղից:
Օգս 23, 2015 | Մեր առօրյան
Խորեն և Շուշանիկ Ավետիսյանների անվան դպրոցի կարևոր արժեքներից է շրջակա միջավայրի պահպանումը: Դպրոցի ամբողջությամբ կանաչապատ տարածքը սրա վառ ապացույցն է: Կրթահամալիրի աշակերտները մեր կանաչ դպրոցի օրինակով վաղ տարիքից գաղափար են կազմում աղբի վերամշակման, էներգիայի խնայողության, շրջակա միջավայրի պահպանման մասին: Այս ամենը նկատի ունենալով՝ մեր սաները չէին կարող չմասնակցել դեկտեմբերի 20-ին Երևանի կենդանաբանական այգում կազմակերպված «Ապրող ծառ» միջոցառմանը, որին մասնակցում էին Երևանի տարբեր դպրոցների շուրջ 500 աշակերտներ:
Վայրի բնության և մշակութային արժեքների պահպանման հիմնադրամի, ՎիվաՍել-ՄՏՍ-ի և Երևանի կենդանաբանական այգու համատեղ նախաձեռնությամբ իրականացվեց «Ապրող ծառ» միջոցառումը, որի նպատակն էր առաջիկա տոներն անցկացնել առանց բնությանը վնաս հասցնելու:
Միջոցառմանը մասնակցող աշկերտների ցանկությունն էր մարդկանց ցույց տալ և համոզել, որ կարելի է Ամանորին մեր տներն ու քաղաքը զարդարել՝ չվնասելով մեր բնությունն ու շրջակա միջավայրը: Ժյուրի կողմից սահմանված որոշակի կոնոններին հետևելով մեր դպրոցի վեցերորդ և յոթերորդ դասարանների սաները դպրոցի տնօրենության և ուսուցիչների օգնությամբ հին ամսագրերի թերթերից պատրաստեցին տոնածառ, սկավառակներից՝ գունեղ խաղալիքներ, բամբակե ձնեմարդ, որը ոչնչով չէր զիջում իսկականին:
Աշակերտները, իրենց պատրաստած յուրօրինակ զարդարանքներով ոգևորված, որոշեցին իրենց բնակարանները ևս պճնել «էկո» տոնածառերով և այլ ՝ բնության համար անվնաս զարդարանքներով:
Այս միջոցառումը նպաստեց դպրոցականների շրջանում բնության հանդեպ պատասխանատու վերաբերմունքի ձևավորմանը:
Օգս 23, 2015 | Մեր առօրյան
2013 թվականին ԱՄՆ-ի Նյու Ջերսի նահանգում Բեթի Չերքեզեանի և Նենսի Բուրդմանի մոտ հղացավ «Սիրով գործված» ծրագրի միտքը, որը նպատակ ուներ նորածին հայ մանուկներին տրամադրել անհրաժեշտ գլխարկներ և ծածկոցներ: ԱՀԱԸ-ն, հավանություն տալով այս գաղափարին, որդեգրեց այս միտքը և ընդգրկեց հայրենիքին ցուցաբերվող մի շարք ծրագրերի մեջ:
Ամեն տարի շուրջ 40.000 մանուկ է ծնվում Հայաստանում, սակայն ոչ բոլոր ծննդատներն են ծածկոցներ և գլխարկներ տրամադրում, իսկ հեռավոր գյուղերում նմանատիպ ծառայություն ընդհանրապես գոյություն չունի:
Այս ամենը հաշվի առնելով՝ «Սիրով գործված» ծրագիրը նպատակ ունի ապագա մայրիկներին՝ նորածինների համար գլխարկներ և ծածկոցներ տրամադրել: Ամերիկայի հայ համայնքները աջակցություն ստացան մի շարք բարերարների կողմից՝ տվյալ ծրագիրն իրականացնելու գործում:
Ամանորյա տոների շրջանակներում ՀԱԸ-ն, համագործակցելով Երևանի Մալաթիա-Սեբաստիա վարչական շրջանի հետ, Խորեն և Շուշանիկ Ավետիսյանների անվան դպրոցում կազմակերպեց հատուկ միջոցառում վարչական շրջանի բոլոր հղի մանկավարժ կանանց համար: Միջոցառմանը ներկա էին ՀԱԸ Հայաստանյան ներկայացուցիչ Հարութ Ներսեսսյանը, դպրոցի տնօրեն Մելանյա Գեղամյանը և վարչական շրջանի կրթության բաժնի պետը: Հանդիպման ժամանակ ցուցադրվեց մայրությանը նվիրված հատուկ ֆիլմ:
Ապագա մայրիկներին բաժանվեցին նաև ձեռագործ ծածկոցներ և գլխարկներ իրենց փոքրիկների համար, ինչպես նաև ԱՀԱԸ օրացույց, բուկլետներ և շնորհավորական բացիկներ:
«Սիրով գործված» ծրագիրի մասնակից կանանց նպատակն է, որ օրերից մի օր բոլոր նորածին հայ մանուկները տուն գնան քեզ նման հոգատար անհատի կողմից գործված գլխարկով և ծածկոցներով:
